Një vit pas reformës në tregun e ilaçeve, Ministria e Shëndetësisë tërheq kushtëzimet ndaj prodhuesve ballkanikë të barnave për të tregtuar në Shqipëri, por kundërshtohet nga opozita.
Ministria e Shëndetësisë u hap dritën jeshile kompanive farmaceutike të Ballkanit, të cilat mund t’i rikthehen tregtisë së ilaçeve në Shqipëri pas ndryshimit të propozuar në ligjin “për barnat dhe shërbimin farmaceutik”.
I miratuar më 31 korrik 2014 në Kuvend, ligji për barnat përcaktonte se kompanitë e Ballkanit mund të tregonin medikamente në Shqipëri, vetëm në rastet kur ato eksportonin në një vend të Bashkimit Europian. Projektligji i ri i Ministrisë së Shëndetësisë, i dorëzuar më 27 korrik 2015 në Kuvend e heq këtë kusht, duke e rihapur tregun shqiptar edhe për kompanitë farmaceutike nga Ballkani që tregtojnë ilaçe vetëm në vendin e tyre.
Në relacionin shoqërues të projektligjit, ky ndryshim justifikohet me marrëveshjen e Tregtisë së Lirë të Europës Qendrore, CEFTA, të firmosur nga Shqipëria.
“Pas miratimit të ligjit nr.105/2014, nga disa vende të Ballkanit u ngrit shqetësimi lidhur me përmbajtjen e nenit 2, shkronja c,” thuhet në relacionin e projektligjit.
“…Ministria e Shëndetësisë, në bashkëpunim me Ministrinë e Zhvillimit Ekonomik, pasi shqyrtoi argumentet e ngritura me detyrimet e marrëveshjes CEFTA, gjykoi se është i domosdoshëm ndryshimi i përmbajtjes së këtij neni”, shkruhet në relacionin shoqërues.
Projektligji që synon të heqë kushtëzimet për kompanitë farmaceutike të Ballkanit po shqyrtohet në komisionet parlamentare dhe ka hasur në kundërshtimin e deputetëve të opozitës.
Kryetari i departamentit të shëndetësisë në Partinë Demokratike, Tritan Shehu tha në një deklaratë për shtyp se projektligji cenon sigurinë e medikamenteve në vend. Ai propozoi ngritjen e një grupi me specialistë vendës e të huaj për të përmirësuar ligjin për barnat në Shqipëri.
“Ky liberalizim godet frymën e ligjit, eliminon kriteret e cilësisë së medikamenteve që qarkullojnë tek ne, mbi të cilat bazohet ligji,” tha Shehu.
Përfaqësues të Ministrisë së Shëndetësisë kanë hedhur poshtë shqetësimet e opozitës për cilësinë e barnave. Milva Ekonomi, drejtore e komanduar e Fondit të Sigurimeve të Detyrueshme tha të dielën se projekligji mundëson “barnat që qarkullojnë në vendet e Ballkanit të gëzojnë të drejtën të regjistrohen edhe në Shqipëri” dhe se kjo nuk cenon sigurinë e medikamenteve.
Reforma në tregun farmaceutik, e ndërmarrë verën e vitit 2014 nga Ministria e Shëndetësisë synoi uljen e çmimit të ilaçeve dhe një furnizim më të mirë me barna qendrave spitalore. Por një investigim i BIRN, i publikuar më 18 shtator 2015 zbuloi se tregu farmaceutik dhe qendrat shëndetësore vuajnë ende nga mungesa të shumta të medikamenteve bazike. Mjekë dhe ekspertë të intervistuar nga BIRN ia faturojnë këtë situatë daljes nga tregu të kompanive ndërkombëtare me emër në fushën e farmaceutikës. Një rol jo të vogël në kaosin e furnizimit me ilaçe zinin edhe kompanitë farmaceutike të Ballkanit, të cilat ligji i barnave i nxorri jashtë tregut.