“Mohimi i të drejtës së protestës kundër aferës CEZ në rrugën Abdi Toptani në Tiranë këtë të enjte nga grupimi “Protestuesit” mund të konsiderohet si një mbrojtje institucionale ndaj shkelësve,” tha për BIRN një prej përfaqësuesve të protestave.
Një grupi të rinjsh dhe qytetarësh të mbledhur nën grupimin “Protestuesi” u është refuzuar nga Ministria e Punëve të Brendshme kërkesa për të protestuar në rrugën Abdi Toptani, pranë Bashkisë së Tiranës këtë të enjte. Sipas shkresës së bërë publike nga ky grupim, arsyeja është mungesa e efektivëve të policisë së cilët Drejtoria e Policisë së Tiranës ka argumentuar se do të jenë të angazhuar në ndeshjen e futbollit, Shqipëri-Serbi.
“Sipas nesh, arsyeja e refuzimit të kërkesës është qesharake. Tirana nuk mund të jetë e zbrazur nga policia për një ndeshje futbolli,” tha për BIRN Rigels Xhemollari, një përfaqësues i grupimit. “Ne gjithashtu dyshojmë se institucionet po i dalin krah megakorrupsionit të CEZ, duke na penguar të organizojmë një protestë civile, paqësore”, shtoi ai.
“Protestuesi” është një grup të rinjsh dhe qytetarësh, të cilët e kanë shpallur të enjten e çdo jave si ditën qytetare të protestës kundër shkeljeve të pushtetarëve në vend. Ata organizuan të enjten që shkoi (1 tetor) një protestë paqësore kundër aferës korruptive në sektorin energjetik CEZ Shpërndarje, të cilën BIRN e ekspozoi.
“Ne jemi qytetarë, të revoltuar nga mafiozët e pushtetit politik, të cilët jo vetëm që vjedhin paratë publike e të qytetarëve, por nuk kursejnë burgun për çdo kryefamiljar në kufijtë e mbijetesës, si dhe luajnë me çmimin e energjisë, luajnë me jetët e qytetarëve, sipas interesave të xhepave të tyre në dëm të xhepave tanë”, tha grupimi “Protestuesi” në një deklaratë për shtyp.
Rrjeti Ballkanik i Gazetarisë Investigative BIRN, zbuloi më 3 qershor 2015 pas një investigimi të gjatë se ish kreu i bordit të drejtorëve të CEZ Shpërndarje, dega e grupit CEZ në Shqipëri, Josef Hejsek, dhe biznesmeni shqiptar, Kastriot Ismailaj, janë organizatorët e një skeme mashtruese të mbledhjes së borxheve e cila i kushtoi kompanisë miliona euro. (Kliko këtu për të lexuar investigimin). Skema u shfaq pasi grupi CEZ bleu një paketë dominuese aksionesh të kompanisë shqiptare të shpërndarjes së energjisë elektrike OSSH, më 2009, dhe duket se kjo skemë synonte të ndikonte politikanët shqiptarë dhe Entin Rregullator të Energjisë, ERE, përmes ryshfeteve.