Si pjesë e politikës së tij pro-BE, Mali i Zi po vë në zbatim sanksionet e Bashkimit Europian të vendosura kundër disa vendeve kryesisht të Lindjes së Mesme.
Mali i Zi ka zgjeruar listën e vendeve kundër të cilëve ai ka një embargo armësh, duke u afruar edhe më shumë me BE-në, të cilës shpreson t’i bashkohet së shpejti.
Një dokument qeveritar, të cilin BIRN e ka parë, tregon se lista e vendeve kundër të cilave janë vendosur sanksionet përfshijnë Bjellorusinë, Korenë e Veriut, Iranin, Irakun, Libanin, Afganistanin, Egjiptin, Somalinë dhe Zimbabvenë.
Pjesa më e madhe e masave kanë të bëjnë me embargo armësh, ndalime udhëtimi, ngrirje fondesh dhe burime ekonomike, por edhe kufizime për pranim individësh të dyshuar për krime të rënda.
Sanksionet kundër Koresë së Veriut përfshijnë ndalimin e tregtimit të “disa mallrave luksoze”, ndërsa embargoja ndaj Iranit përfshin ndalim eksportesh të një teknologjie të caktuar që mund të kontribuojnë në zhvillimin e mëtejshëm të programit bërthamor të Iranit.
Për të qenë në përputhje me politikën e jashtme dhe atë të sigurisë të BE-së, Mali i Zi ka prezantuar një embargo mbi eksportet e armëve në Libi, ku për vite me radhë ka eksportuar një sasi të konsiderueshme armësh dhe pajisjesh ushtarake.
Qeveria tha se po i bashkohej sanksioneve Perëndimore në pajtim me Programin Kombëtar për Integrimin e Malit të Zi në Bashkimin Evropian.
Masat u imponuan gjithashtu për të “mbështetur respektimin e të drejtave të njeriut, demokracisë dhe sundimit të ligjit”, tha ajo.
“Aleancë me pozicionin e përbashkët të BE-së është një nga elementet mbi të cilat Komisioni Evropian vlerëson përmbushjen e kritereve për anëtarësim,” theksohej në dokument.
Pavarësisht kritikave, Mali i Zi në vitin 2014 mbështeti sanksionet Perëndimore kundër Rusisë të imponuara si masë ndëshkuese për aneksimin e Krimesë nga Ukraina.
Mali i Zi, me një popullsi prej vetëm 600.000 banorësh, tradicionalisht ka pasur lidhje të forta me Rusinë dhe rreth 40% e pasurive të patundshme në vend është në pronësi të shtetasve rusë.
Në gusht, Mali i Zi gjithashtu riimponoi sanksione kundër Bjellorusisë për abuzime me të drejtat e njeriut, përfshirë një embargo për armët dhe ndalim udhëtimi për presidentin Aleksandër Lukashenko, si edhe ndaloi dhënien e vizave dhe ngriu asetet për rreth 200 persona pranë tij.