Pas një sezoni veror nga më të nxehtët dhe më të thatët në historinë e rajonit, shirat e dendur po nxisin përmbytje dhe po kthejnë kujtime të këqija të shkatërrimit natyror të vitit të shkuar.
Shërbimet e emergjencës dhe autoritetet lokale po përgatiten të përgjigjen ndaj shirave të dendur dhe erërave të forta që kanë përfshirë rajonin gjatë dy ditëve të fundit dhe vendasit shprehën frikën për një përsëritje të përmbytjeve shkatërrimtare të rajonit në maj 2014, ku vdiqën dhjetëra vetë dhe u shkaktuan miliarda euro dëme.
Përmbytja u shoqërua nga parashikime të më shumë shirave në rajon për të paktën edhe një ditë tjetër.
Situata ishte më kritike në pjesët perëndimore të Ballkanit ku shirat e dendur vazhduan për dy ditë, duke shkaktuar përmbytje në disa pjesë të Kroacisë, Bosnjes dhe Shqipërisë.
“Njerëzit kanë frikë, shumë frikë,” tha për BIRN, Nebojsa Miljus, kreu i zjarrfikësve në njësinë e Prijedorit në Bosnje.
“Ata na telefonojnë gjithë kohën dhe disa prej tyre janë vëërtet në panik. Ne përpiqemi t’i qetësojmë dhe t’i këshillojmë se çfarë të bëjnë”, tha ai.
Serbia nuk është prekur keq por ka filluar të përgatisë sistemet e mbrojtjes nga përmbytjet në rast se del nga shtrati Danubi, Sava ose Drina.
Në Kroaci, pjesa më e madhe e Karlovaçit u përmbyt nga uji, teksa nivelet e lumenjve Kupa dhe Korana u rritën me 17 centimetra brenda natës së të mërkurës dhe vazhduan të rriten edhe të enjten.
Situata është e ngjashme në Bosnjen fqinje, ku dy ditë shira të dendur shkaktuan përmbytje në disa pjesë të vendit.
Lumi Una në veriperëndim të Bosnjës u rrit me gati dy metra në 24 orë. Dalja e tij nga shtrati përmbyti dhjetëra shtëpi dhe ndërtesa në Prijedor, Novi, Grad, Gradiska dhe Kostajnicë.
Autoritetet vendase në pjesët veri-perëndimore të Bosnjës paralajmëruan publikun se lumenjtë Una dhe Sana pritet të vazhdojnë të rriten dhe janë bërë thirrje që njerëzit të fillojnë të mbrojnë shtëpitë.
Situata në Shqipëri pritet të jetë po aq e keqe për sa i përket shirave të dendur që do të përfshijnë vendin. Një javë më parë qytete si Vlora, Fieri, Durrës, Elbasani dhe Lezha u gjendën nën ujë.
Ministri i Bujqësisë paralajmëroi se Shqipëria do të vuajë këtë vit dhe vitin e ardhshëm nga reshjet e dendura të shiut.
