Teksa Sllovenia po dërgon trupa ushtarakë për të kufizuar fluksin e refugjatëve në Slloveni, mijëra migrantë lejohen ende të kalojnë në Kroaci nga Serbia.
Refugjatët po grumbullohen në kufirin mes Kroacisë dhe Serbisë, ku rreth 3500 prej tyre të mërkurën në mëngjes u ndodhën në kufirin Berkasovo-Bapska.
Policia kroate po lejon refugjatët të hyjnë periodikisht në grupe nga 50 dhe 100 veta, duke i transportuar ata në kampin aty pranë në Opatovaç, ku rreth 4207 refugjatë ndodhen aktualisht.
Shumë prej tyre e kaluan natën në shi, ndërsa disa u strehuan brenda tendave të ngritura nga Agjencia e OKB për Refugjatët, UNHCR.
Melita Sunjiç, zëdhënëse e UNHCR, tha se shumica e refugjatëve refuzuan të kthehen në tendat e vendosura në territorin serb, me shpresën që Kroacia do ta hapë pikën e vet të kalimit.
“Shumica e tyre e kaluan natën duke qëndruar në pikën kufitare,” citoi agjencia e lajmeve Beta, të ketë thënë Sunjiç.
Ajo shtoi se UNHCR ka mjaftueshëm ushqim dhe batanije për refugjatët që ndodhen në zonën e kalimit të kufirit.
Sipas autoriteteve serbe, rreth 5000 refugjatë po hyjnë në Serbi çdo ditë nga Maqedonia.
Ndërkohë, Sllovenia të mërkurën miratoi një ligj që i jep lejen ushtrisë të shkojë në kufirin me Kroacinë.
Ligji i dërgimit të trupave në kufi dhe dhënia e autoritetit policor ndaj tyre u votua në mëngjesin e së mërkurës dhe hyri në fuqi menjëherë.
Ligji u mbështet me 66 vota pro dhe pesë kundër.
Refugjatët po shkojnë në Slloveni me trena dhe autobusë të organizuar nga autoritetet kroate nga kufiri me Serbinë në Kroacinë jugore.
Kryeministri kroat Zoran Milanoviç tha të martën se ai nuk do të lejonte që refugjatët të “bëheshin kapic” në Kroaci.
Në total 210,007 refugjatë kanë hyrë në Kroaci që nga 16 shtator, kur refugajtët vërshuan në vend pas mbylljes së kufirit Hungari-Serbi.
