Shpëtime Pitaku, gjyqtarja e kontestuar gjatë procesit të ish-kryetarit të komunës Rrashbull akuzohet nga ILDKP se ka fshehur pasurinë përmes deklarimeve të rreme dhe dokumenteve të falsifikuara.
Inspektoriati i Lartë i Deklarimit dhe Kontrollit të Pasurive padit në Prokurori një tjetër gjyqtare për fshehje pasurie dhe dyshim për pastrim parash. Shpëtime Pitaku, gjyqtare e Gjykatës së Durrësit akuzohet se ka fshehur rreth 1 milion dollarë pasuri, përmes falsifikimit të dokumentave.
ILDKPKI tha në një njoftim për shtyp se kishte realizuar kontrollin e plotë të pasurisë së deklaruar të gjyqtares Pitaku, nga e cila rezulton se ka “fshehje pasurie, deklarime të rreme të interesave private, falsifikim dokumentash dhe mungesë burimesh të ligjshme në shumën e 1 milion dollarëve”.
“Për rrjedhojë, subjekti Shpëtime Pitaku është kallëzuar penalisht për veprat penale të parashikuara nga nenet 257/a/2 dhe 287 të Kodit Penal”, thuhet në njoftimin e ILDKPKI.
Lidhur me këtë rast, Inspektoriati i Lartë i Deklarimit dhe Kontrollit të Pasurive i ka kërkuar Prokurorisë një hetim të plotë dhe të gjithanshëm për gjyqtaren Pitaku, e kallëzuar edhe më parë nga i njëjti institucion për falsifikim të dokumenteve zyrtare.
Gjyqtarja e Gjykatës së Durrësit, Shpëtime Pitaku nuk është zyrtarja e vetme në radhët e gjyqësorit, e kallëzuar nga ILDKPKI për fshehje pasurie. Gjatë vitit të fundit, ky institucion ka kallëzuar disa gjyqtarë në Prokurori, edhe pse pak prej tyre kanë dalë përpara gjykatës.
Emri i Pitakut është lakuar gjatë kohëve të fundit për procesin gjyqësor ndaj ish-kryetarit të komunës Rrashbull, Hysen Gashi. Më 7 tetor 2015, gjyqtarja Pitaku rrëzoi kërkesën e prokurorisë për dënimin me 5 vjet burg të Gashit dhe e shpalli të pafajshëm atë. Vendimi u kundërshtua nga Prokuroria, e cila akuzoi gjyqtaren se kishte qenë e njëanshme gjatë procesit.