Gjelosh Progni, Drejtor i Auditit, akuzohet se mori 500 mijë lekë (3,600 euro) me premtimin se do të siguronte një vend pune, por u kallëzua nga aplikantja pasi kjo e fundit dyshoi se qe mashtruar.
Një drejtor i Bashkisë së Tiranës u arrestua nga policia sot (6 nëntor 2015) pas katër muajsh hetimesh mbi kallëzimin e një qytetareje që kërkoi punë dhe pagoi 500 mijë lekë për këtë vend pune, por doli e gënjyer nga drejtori, i cili ndërkohë refuzoi t’i kthejë paratë me argumentimin se “shefi” përgjegjës për sigurimin e punës e kishte gënjyer.
Gjelosh Progni, 38 vjeç, Drejtori i Auditit (kryeinspektor), pranë Bashkisë Tiranë, është arrestuar mesditën e premtes për veprën penale të “Korrupsionit pasiv të personave që ushtrojnë funksione publike”, parashikuar nga neni 259 i Kodit Penal.
Progni u kallëzua katër muaj më parë nga Valbona Bregu, e cila i tha policisë se e kishte paguar ryshfetin në dhjetor të vitit 2013 duke marrë para borxh, por Progni nuk ia kishte siguruar vendin e punës dhe nuk kishte arritur të kthente pas të gjithë shumën e parave.
Kallëzimi i Bregut i regjistruar në dosjen e prokurorisë thotë se Gjeloshi pati vajtur në një lokal më 25 dhjetor 2012.
“Gjatë bisedës së zhvilluar ai tha se kundrejt pagesës prej 500 ijë lekësh (3,600 euro), ai do të më fuste në punë te Bashkia Tiranë,” deklaroi Bregu para prokurorëve sipas dosjes hetimore.
Bregu i kërkoi vëllezëve emigrantë në Itali t’ia jepnin këto me urgjencë dhe paratë u transferuan dhe u paguan më 27 dhjetor 2012. Por në janar 2013, Bregu filloi të dyshojë se po mashtrohej. Pas këmbënguljeve të shumta, të Bregut, Gjeloshi pranoi të nënshkruajë një kontatë noteriale ku linte peng një apartament në këmbim të parave të ryfshetit.
Sipas kallëzimit, Bregu kërkoi bllokimin e hipotekës së apartamentit, i cili rezultoi se qe nën pronësinë e një shtetasi tjetër, i cili nuk kishte dijeni për kontratën noteriale.
Në dhjetor të vitit 2014, Progni ktheu një pjesë të parave të marra ryshfet një vit më parë dhe nënshkroi një kontratë të dytë noteriale për të njohur borxhin e mbetur me premtimin se do ta shlyente atë në mars 2015. Prokuroria thotë se ai nuk arriti ta shlyejë borxhin dhe Bregu kreu kallëzim.
Pas hetimeve, policia kreu arrestimin e tij si i dyshuar për veprën penale të penale të “Korrupsionit pasiv të personave që ushtrojnë funksione publike”.
Pagesa e ryshfetit në këmbim të vendeve të punës në sektorin publik është një fenomen i njohur në Shqipëri.