Edhe pse në Shqipëri kryeministri është piktor dhe nuk nguron të prezantohet si i tillë, artistët ankohen që arti bashkëkohor promovohet dhe vlerësohet shumë pak – aq sa disave prej tyre i duket vetja si Don Kishoti.
Të shtunën e 31 tetorit, në Tiranë u hap Salloni i Artit Bashkëkohor, i cili mblodhi trembëdhjetë artistë shqiptarë nën moshën 40-vjeç në një ekspozitë të përbashkët të formave të ndryshme të artit nga pikturat, te fotot, instalacionet, videot dhe filmat.
Ekspozita e hapur në galerinë e Muzeut Historik Kombëtar vjen si bashkëpunim i Ministrisë së Kulturës me Qendrën e George Pompidou në Paris, kuratorët e së cilës përzgjodhën grupin e artistëve, që pas ekspozitës në Tiranë do të prezantohen edhe në Francë.
“Salloni ka bërë bashkë artistë të mirë dhe të talentuar shqiptarë dhe gjithashtu përfshin personalitete të artit bashkëkohor në Francë,” tha për BIRN Gentian Shkurti, artist vizual që është prezantuar me dy punime, pjesë të ciklit “Back to the future” (Kthim në të ardhmen), i cili frymëzohet nga letërsia fantastiko-shkencore shqiptare e viteve 80’.
Ekspozita përfshinte artistët Endri Dani, Klodian Deda, Arbër Elezi, Yllka Gjollesha, Ilir Kaso, Greta Pllana, Leonard Qylafi, Gentian Shkurti, Marina Sula, Ermela Teli, Driant Zeneli, Fani Zguro dhe Enkelejd Zonja.
Ekspozita e artistëve është mirëpritur nga publiku që vizitoi çeljen e Sallonit, i cili do të qëndrojë i hapur deri më 9 nëntor.
“Aktivitete kulturore të këtij lloji janë shumë të nevojshme dhe të rëndësishme sepse bëjnë bashkë njerëz nga të gjitha shtresat. Po ashtu, ato shërbejnë si një frymëzim për ne artistët e rinj,” tha për BIRN Rubin Kadiu, një student i Universitetit të Arteve në Tiranë, gjatë vizitës në ekspozitë.
Një nga vizitorët e ekspozitës ka qenë dhe kryeministri Edi Rama, i cili vetëm pak ditë më parë hapi në Hong Kong një ekspozitë me vizatimet e tij të titulluar “Calendar Blossoms” (Lulëzimi i kalendarit).
“Një zhvillim i bukur në mbështetje të talenteve të këtij vendi me mbështetjen edhe të Qeverisë Franceze,” u shpreh Rama në rrjetin social Facebook pas vizitës në Sallonin e Artit Bashkëkohor.
Megjithëse e ndajnë vlerësimin e kryeministrit për ekspozitën, artistët pjesëmarrës në Sallon ankohen që ky aktivitet kulturor është një nga rastet e pakta kur artit bashkëkohor në Shqipëri i hapet një dritare për t’u promovuar.
“Artistët shqiptarë bashkëkohorë ngjajnë me Don Kishotë sepse këtu nuk ka skenë të artit bashkëkohor, si për shembull muze, galeri, kuratorë, kritikë që ta bëjnë këtë punë në mënyrë të mirëfilltë dhe të vazhdueshme,” tha Shkurti.
“Arti bashkëkohor në Shqipëri po kthehet në hobi, sepse nuk shitet, nuk promovohet dhe nuk merr vlerësimin e duhur,” shtoi ai.
Ilir Kaso, artist i veprës “Ëndërrimtarët e Realitetit”, i fokusuar te instalacionet dhe arti konceptual është dakord me Shkurtin, duke thënë që në vend ka shumë pak hapësira për të ekspozuar.
“Kjo ekspozitë është pozitive për mjedisin aktual të artit në Shqipëri, por do të doja që t’i kushtohej më tepër rëndësi talenteve të reja në vendin tonë pasi edhe unë vetë jam ekspozuar më tepër jashtë shtetit sesa në Shqipëri,” tha ai.
