Ministri i Drejtësisë, Nasip Naço jep dorëheqjen pa dhënë arsye, por zëvendësohet brenda pak orësh nga Ylli Manjani, duke i kufizuar ndryshimet në qeveri vetëm në segmentin që kontrollohet nga Lëvizja Socialiste për Integrim.
Ylli Manjani, zv.kryetar i Lëvizjes Socialiste për Integrim do të jetë ministri i ri i Drejtësisë në kabinetin e Edi Ramës. Ai zëvendësoi në këtë detyrë Nasip Naçon, vetëm pak orë pasi ai dha dorëheqjen, duke e shtrënguar kryeministrin Rama të firmosë të paktën një ndryshim në qeverinë e tij.
Ministri i dorëhequr, Nasip Naço nuk ka dhënë komente mbi arsyet e dorëheqjes së tij. Por kryeministria sqaroi përmes një njoftimi për mediat se Rama e kishte pranuar dorëheqjen dhe kishte falenderuar Naçon për kontributin.
Më pas, kryeministri ka takuar aleatin e tij në qeverisje, Ilir Meta dhe ka diskutuar për zëvendësimin e ministrit Naço. Brenda pak orësh është vendosur që ministria e Drejtësisë t’i mbetej LSI-së dhe në krye të saj të emërohej Ylli Manjani.
“Duke vlerësuar se kandidatura e Ylli Manjanit është më e përshtatshmja për të çuar më tej punën e nisur në drejtimin e institucionit, Kryeministri ka diskutuar më pas me zotin Manjani përfshirjen e tij në kabinetin qeveritar,” thuhet në njoftimin e kryeministrisë.
Sipas zyrës së shtypit, kryeministri ka diskutuar me Manjanin mbi reformën në drejtësi, përmirësimin e shërbimit në hipoteka dhe reformat e tjera në fushën e së drejtës.
Dorëheqja e ministrit Nasip Naço vjen në kulmin e përgatitjeve për reformën në drejtësi, e cila pritet të kalojë në Kuvend para fundit të vitit. Megjithatë, ky akt mund të lexohet edhe si pasojë e qëndrimit të kryetarit të LSI-së, Ilir Meta, i cili kërkonte ndryshime në qeveri.
Përkundër thirrjeve publike të aleatit të tij, Rama pati mohuar më shumë se një herë se do të bënte ndryshime në kabinetin e tij. Por lëvizja e beftë e Naços solli megjithatë ndryshim vetëm në njërin prej segmenteve të qeverisjes, që kontrollohet nga LSI.
Ministri i ri i Drejtësisë, Ylli Manjani është jurist me profesion dhe aktualisht kryente detyrën e zv.ministrit të Transporteve. Paralelisht me postet shtetërore, ai ka mbajtur edhe poste të larta drejtuese në Lëvizjen Socialiste për Integrim.
Pas lëvizjeve të së hënës, kryeministri Edi Rama ka dërguar emrin e Manjanit për dekretim tek presidenti Bujar Nishani, duke mbyllur përkohësisht debatin për ndryshime të tjera në kabinetin e tij qeverisës.