Presidentja e Kosovës Atifete Jahjaga shpalli të dielën ditë zie në Kosovë për sulmet terroriste në Paris ku u vranë 129 persona.
Lajmi bëhet i ditur nga Departamenti i Informacionit dhe Komunikimit me Publikun në Presidencë.
“Presidentja e Republikës së Kosovës Atifete Jahjaga ka shpallur të dielën ditë zie në Kosovë, në nderim të viktimave të sulmeve terroriste të mbrëmshme në Paris dhe në solidarizim me popullin e Francës,” thuhet në njoftim.
Me vendim të Jahjagës do të ulen në gjysmështizë flamujt në të gjitha objektet shtetërore të Kosovës brenda e jashtë vendit.
Në sulmin për të cilin përgjegjësinë e mori ISIS-i janë vrarë 129 persona, ndërsa janë sulmuar gjashtë vende në kryeqytetin francez.
Sulmet e sw premtes nw Paris pasojnë sulmin terrorist kundwr gazetës satirike franceze “Charlie Hebdo” nw Janar, kur u vranw 12 persona.
Zëvendës Kryeministri dhe Ministri i Jashtëm i Kosovës, Hashim Thaçi, ishte zyrtari i parë kosovar që reagoi ndaj sulmeve të sw premtes në Paris.
“Jemi të shokuar me sulmet në Paris ku po raportohet për shumë viktima. Kosova lutet për familjet dhe popullin francez sonte”, shkroi Thaçi në profilin e tij në Facebook, të shoqëruar me një flamur të Francës.
Ministria e Punëve të Jashtme e Kosovës njoftoi se nuk ka kosovarë të lënduar nga sulmet në Paris.
“Ambasada e Republikës së Kosovës në Paris dhe Ministria e Punëve të Jashtme janë në kontakt të vazhdueshëm me autoritetet franceze dhe sipas informacioneve të deritashme të zyrtarëve të MPJ-së, nuk ka konfirmime se ndonjë qytetar i Kosovës është plagosur në sulmet në Paris,” thuhet në komunikatën e MPJ-së.
MPJ-ja njofton se qytetarë të Kosovës kanë telefonuar në ambasadën në Francë për të mësuar për të afërmit e tyre me të cilët nuk kanë mundur të kontaktojnë pas sulmeve.
“Gjithashtu, një numër i qytetarëve të cilët mbrëmë nuk kanë arritur të kontaktojnë me familjarët e tyre që jetojnë në Paris, po telefonojnë në numrin emergjent të Ambasadës së Kosovës në Paris për të pyetur për ndonjë informatë në lidhje me ta,” vijon komunikata e MPJ-së.
Sipas Ministrisë së Punëve të Jashtme kosovarët po interesohen më shumë nëse mund të udhëtojnë drejt Francës.
“Qytetarët tanë po thërrasin në numrin e emergjencës të Ambasadës së Kosovës në Paris kryesisht për të pyetur nëse mund të udhëtojnë nga Parisi për Prishtinë apo anasjelltas dhe se a janë të hapur kufijtë për udhëtim në Francë,” tregon komunikata.
Pas sulmeve të djeshme në Paris që lanë shumë të vrarë, Franca shpalli gjendje emergjente., ndërsa sulmet u dënuan nga zyrtarë kosovarë dhe subjekte politike të vendit.
MPJ-ja njofton se ambasada në Francë po ndjek me vëmendje gjendjen e krijuar pas sulmeve.
“Ambasada në Francë i ka përcjellë me kujdes të gjitha zhvillimet në Paris dhe mbetet në gatishmëri për të ndihmuar qytetarët e Kosovës në rast nevoje,” përfundon komunikata.
Marrë nga Kallxo.com
