Ndërthurja e pikturave të famshme dhe fëmijëve të sindromës Down në Shqipëri rezultoi një ekspozitë e goditur për sensibilizimin e publikut se këta fëmijë janë “plot ngjyra nga brenda” dhe jo “bardhezi” siç janë portretizuar zakonisht.
Një artiste shqiptare, Soela Zani, ka përdorur pasionin e saj, fotografinë, për të rritur ndërgjegjësimin e publikut ndaj një çështje sa të ndjeshme, aq edhe të panjohur në Shqipëri, fëmijëve të sindromës Down.
Ekspozita “Edhe unë jam një vepër arti” e çelur më 6 nëntor në Muzeun Historik Kombëtar u organizua në kuadër të muajit tetor të ndërgjegjësimit për personat me sindromën Down.
Përmes rikrijimit të tablove të piktorëve të famshëm shqiptarë dhe botërorë si Kol Idromeno, Joshua Reynolds, Edouart Manet, Peter Paul Rubens dhe Pablo Picasso, fotografja Soela Zani ka vënë në qendër të objektivit të aparatit të saj 14 fëmijë me sindromën Down në Shqipëri.
“Disa fotografë zgjedhin t’i përshkruajnë në foto këta fëmijë duke i dhënë nota dramaciteti dhe duke luajtur me nuancat bardhezi, por këndvështrimi im për ta mori ngjyra kur u njoha më afër,” tha për BIRN Soela Zani, fotografja që prej 7 vitesh punon me subjektin e familjeve dhe fëmijëve.
“Çdo fëmijë është i bukur, por këta fëmijë janë edhe më të bukur. Për më tepër që arti e përcjell mesazhin më bukur se çdo mjet tjetër komunikimi,” shtoi ajo.
Një risi për nga zhanri fotografik sensibilizues, ekspozita e hapur në bashkëpunim me shoqatën Down Syndrome Albania, është mirëpritur shumë mirë nga publiku.
“Krenohemi me fëmijët tanë përmes punës suaj të mrekullueshme,” u shpreh nëna e një prej modelëve të vegjël që pozoi për fotografinë e frymëzuar nga vepra “Master Bunbury” Joshua Reynolds.
“Jam e lumtur që ideja pati një impak te publiku. Besoj se paragjykimet ndaj fëmijëve të sindromës Down po bien dhe mentaliteti i shoqërisë është zhvilluar në këtë aspekt,” tha për BIRN Zani.
“Megjithatë këta fëmijë kanë nevojë për gjithëpërfshirje më të madhe në shoqëri dhe t’u ofrohet mundësia e punësimit pas moshës 18-vjeçare”, shtoi ajo.
“Ekspozita është ndër aktivitetet e vetme që mbetet në mendjen e njerëzve dhe në kujtesën e tyre sepse godet përmes imazhit,” tha për BIRN, Flavia Shehu, koordinatore e Qendrës së Arritjeve dhe Zhvillimit pranë Down Syndrome Albania.
“Ndër problematikat e fëmijëve me sindromën Down në Shqipëri është se ata nuk përfshihen në aktivitete të shumta dhe duhet t’i jepet terren për të treguar se dinë të angazhohen seriozisht në tema të caktuara,” shtoi ajo.
Ekspozita “Edhe unë jam një vepër arti” qëndroi e hapur në Muzeun Historik Kombëtar deri më datë 16 nëntor.