Pas sulmeve të Shtetit Islamik në Paris, ku mbetën të vrarë të paktën 129 persona, shumë refugjatë në kryeqytetin serb përgjatë rrugës për në Europën Perëndimore tani i tremben mundësisë që vendet e BE-së të mbyllin kufirin.
“Ne jemi të trembur se ata do të mbyllin kufirin tani. Por nuk i trembemi terrorit më. Çdo fshat në Siri është më keq se në Paris… nuk kemi shumë për të humbur,” tha një 17-vjeçar sirian i quajtur Mossa për BIRN në Beogradin qëndror.
Mossa tha se ai dhe disa miq të tij sirianë do të drejtohen për në kufirin kroat dhe se shpresojnë të mund të arrijnë Europën Perëndimore.
Shumë refugjatë i tremben mundësisë së mbylljes së kufirit në BE pas sulmeve të së premtes në Paris.
Media raportoi në fundjavë se një burrë me pasaportë siriane që u gjend në një nga skenat e krimit në sulmet e Parisit kishte kaluar përgjatë Maqedonisë, Serbisë dhe Kroacisë në tetor, duke u shtirur si refugjat.
Kjo bëri që politikanët e krahut të djathtë në të gjihtë BE-në të bëjnë thirrje për mbyllje të kufirit, duke thënë se kishte prova se militantët e Shtetit Islamik po fshiheshin mes refugjatëve.
Sadam Ahmed, 19-vjeç nga Afganistani, tha për BIRN se vrasjet në Paris kishin shkaktuar shumë probleme për refugjatët.
“Ne jemi në telashe të mëdha tani… ne vijmë nga një luftë dhe ata duan të na kthejnë atje për shkak të kësaj,” tha ai.
Ahmed, që do të shkojë në Zvicër, tha se policia e BE-së duhet të krijojë një procedurë për të dalluar terroristët nga refugjatët e zakonshëm.
“Ata duhet t’i kontrollojnë disi njerëzit… të marrin shenja gishtash… të bëjnë çfarë është e nevojshme për të na dalluar, sepse nuk jemi terrorist… duam vetëm të fillojmë një jetë të re nga e para,” tha ai.
Ai tha se ishte hasur me ISIS sepse ata kanë një bazë në fshatin e tij Pekha në distriktin Achin të Afganistanit.
“Humba prindërit, dy vëllezërit dhe një motër. Nuk e di se ku janë ata në këtë moment. Ushtarët e ISIS kanë një seli në fshatin tim dhe kushdo i trembet atyre… ne gjithashtu po ia mbathim nga talebanët,” tha ai.
Një nga oficerët e policisë në krye për të garantuar sigurinë në parqet e Beogradit ku refugjatët qëndrojnë për të kaluar natën përpara se të nisen drejt BE-së tha për BIRN se policia nuk kishte ndërmarrë masa specifike pas sulmeve në Paris.
“Ne kemi të njëjtat procedura si më parë, por nuk mund t’jua tregoj pasi janë sekret,” tha ai.
Ai shtoi se rreth 100 refugjatë mbërrijnë në Beograd çdo ditë. Shumica e kalojnë natën në qendrën e pritjes së refugjatëve në lagjen Krnjaca dhe të nesërmen nisen drejt kufirit kroat.
Agjencia e OKB për refugjatët ka thënë se nga 1 janari deri më 14 nëntor të këtij vitit, ishin regjistruar 416 mijë refugjatë nga Lindja e Mesme që synon azil ose kalonin përgjatë Serbisë për në BE.
Hikmat nga Afganistani, i cili mbërriti në Beograd katër ditë më parë duke ecur përgjatë pyjeve bullgare pa ujë dhe ushqim, tha se ISIS kishte vrarë këdo që nuk donte t’i bashkohej.
“Ose me ta ose je i vdekur – kështu mendon ISIS. Nuk mund të negociosh me ta,” tha ai.
Hikmat thotë se shpreson shumë në vlerat europiane dhe se kufiri nuk do të mbyllet.
“BE-ja është e mirë, ne nuk i trembemi BE-së. Të rinjtë afganë që duan të punojnë mund t’ia dalin këtu. Ata kanë respekt për njerëzit, unë kam besim te kjo gjë,” tha ai.
