Premtimi i kryeministrit serb Aleksandër Vuçiç për fonde për zhvillimin e Srebrenicës javën e kaluar kënaqi bizneset vendase, por disa thonë se Beogradi i detyrohet shumë më tepër qytetit boshnjak.
Politikanët që morën pjesë në forumin e biznesit javën e kaluar në Srebrenicë, në të cilën mori pjesë edhe Vuçiçi, u shprehën të kënaqur me ofertën bujare të kryeministrit serb, i cili javën e kaluar ktheu vizitën në qytet, pavarësisht se u sulmua me gurë kur ishte atje në korrik.
Megjithatë, vendasit janë ndarë rreth premtimit të Vuçiçit për të dhuruar pesë milionë euro për zhvillimin e qytetit, i cili humbi më mijëra banorë boshnjakë nga masakrat e serbëve të Bosnjës 20 vjet më parë.
“Këto miliona të premtuara nga qeveria serbe nënkuptojnë shumë për këtë qytet. Ato janë ekuivalente me dy vjet buxhet për Srebrenicën,” tha për BIRN Marinko Sekuliç, një gazetar për vendasen Radio Televizija Srebrenica.
“Është shumë e rëndësishme që dy milionë euro do të paguhen direkt në buxhetin e qytetit, gjë e cila parimisht do të thotë që administrata mund t’i përdorë atje ku ka më shumë nevojë,” shtoi Sekuliç.
Njëzet vjet që nga lufta e viteve 1992-1995, Srebrenica ka probleme serioze ekonomike dhe paratë e premtuar nga Vuçiç konsiderohen nga shumë njerëz si thjesht një pjesë e vogël e asaj që Serbia duhet të paguajë.
“Beogradi i detyrohet miliona jo vetëm Srebrenicës, por edhe qytetit të Bratunacit, Visegradit dhe Rogaticës,” tha Mirko Saroviç, Ministri për Tregtinë e Brendshme dhe Marrëdhëniet Ekonomike në Bosnjë.
Ky pretendim nuk ka aspak të bëjë me vrasjen e më shumë se 7,000 burrave dhe djemve boshnjakë në korrik 1995 nga trupat e udhëhequra nga komandanti serb i Bosnjës Ratko Mlladiç. Zemërimi mbi masakrat u zbraz mbi Vuçiçin gjatë vizitës së mëparshme në Srebrenicë me rastin e 20 vjetorit të masakrave në muajin korrik, kur ai u qëllua me gurë dhe shishe nga një turmë të zemëruar dhe u detyrua të largohej.
Saroviç po i referohej kompensimit gjatë epokës së Jugosllavisë të cilin Serbia e përdori për të paguar banorët e këtyre komunave, të cilët vuajtën përmbytje pas ndërtimit të një hidrocentrali në Bajna Basta në Serbi.
Pas luftës, shuma i paguhej çdo vit qyteteve. Pas përfundimit të konfliktit, Serbia ndaloi së paguari kompensimin.
Nermin Alivukoviç, ndihmësi kryetari i kryetarit të komunës së Srebrenicës, thotë se Serbia i detyrohet këtyre komunave rreth 30 milion euro.
Para luftës, Srebrenica ishte një qytet i lulëzuar që tërhiqte turistë nga e gjithë ish-Jugosllavia me llixhat e saj.
Milorad Dodik, presidenti i Republikës Srpska, entiteti të cilit i përket qyteti, premtoi gjatë konferencës së javës së kaluar të rivitalizojë një prej kompanive kryesore në qytet, “Guber Spa”, e cila para luftës ishte një simbol vendas.
Llixha nuk është hapur më që pas luftës. Në vitet e mëparshme, kjo ishte kryesisht për shkak të pengimit nga qeveria e Republikës Srpska, e cila është zyrtarisht në pronësi të burimeve natyrore të qytetit.
Në vitin 2010, një projekt nga kompania Banja Guber AD për të restauruar llixhën dhe dy hotele me një vlerë prej rreth 30 milion Km, rreth 15 milion euro, u bllokua pasi autoritetet e Republikës Srpsa ia dhanë koncesionin për shfrytëzimin e ujërave një kompanie tjetër, Argentum 09. Pronari i saj, Milorad Motika, është asistent në Ministrinë e Industrisë në Republikën Srpska.
Gjatë vizitës së tij javën e kaluar Vuçiç tha se “Serbia tani dëshiron të shikojë drejt të ardhmes”. “Ne serbët duam të kemi marrëdhëniet më të mira të mundshme me boshnjakët. Dëshirojmë të ndërtojmë një të ardhme të përbashkët ku do të jetojmë në paqe për 100 vitet e ardhshme,” tha ai.