Serbia tha se po i mbyllte kufijtë për të ashtuquajturit migrantë ekonomikë pasi Kroacia dhe Sllovenia bënë të njëjtën gjë.
Aleksandër Vulin, ministri i Serbisë për refugjatët tha se Serbia nuk do të lejonte më migrantët ekonomikë pasi Sllovenia dhe Kroacia lajmëruan se i kishin ndaluar migrantë të tillë në vendin e tyre.
“Ne duhet të mbrojmë vendin tonë, ndaj po palikojmë mjete reciproke kundër atyre që Kroacia dhe Sllovenia i konsideron si të papërshtatshëm në vendin e vet,” tha Vulin.
Vetëm refugjatët nga Siria, Afganistani dhe Iraku do të trajtohen si migrantë të ligjshëm, pasi vijnë nga vendet e shkatërruara nga lufta. Të tjerë nuk do të lejohet të hyjnë, pasi vendet e tyre nuk janë në luftë.
Ministri i brendshëm kroat, Ranko Ostojiç tha të enjten se njerëzit nga Maroku, Bangladeshi, Sri Lanka, Algjeria, Liberia, Kongo, Sudani, Pakistani do të trajtohen tani si migrantë ilegalë.
Ostojiç tha se ai i kishte informuar kolegët nga Maqedonia dhe Serbia se shtetasit e këtyre vendeve nuk do të përdorin më itinerarin e zakonshëm.
Ai tha se gjithashtu Kroacia kishte refuzuar të merrte mbrapsht nga Sllovenia 162 persona nga Maroku, Bangladeshi, Sri Lanka dhe Liberia, sepse dy vendet nuk kishin një marrëveshje për këtë çështje.
Edhe agjencia e lajmeve sllovene, STA, të enjten raportoi se nuk do të lejonte më migrantë ekonomikë.
Policia sllovene po kontrollon kombësinë e refugjatëve në bazën ndërkombëtare të të dhënave për të vendosur nëse do të lejohen të kalojnë apo jo.
Maqedonia ndërkohë filloi ndërtimin e një gardhi kufitar pranë Gevelijës përgjatë kufirit me Greqinë për të kontrolluar hyrjen e refugjatëve dhe migrantëve.
Melita Sunjic, nga organi i refugjatëve pranë OKB, UNHCR, konfirmoi se tre shtetet kishin mbyllur kufirin për refugjatët ekonomikë por e quajti politikën të papranueshme.
Vendet nuk duhet të lejojnë hyrjen e njerëzve në bazë të kombësisë dhe tha se çdo refugjat duhet të ketë të drejtën e azilkërkimit.
Nga 1 janari deri më 14 nëntor sipas agjencisë së refugjatëve të OKB, janë regjistruar 416,000 refugjatë nga Lindja e Mesme që kanë kërkuar azil ose kanë kaluar në Serbi gjatë rrugës për në BE.
