Zyrtarë të lartë ushtarakë të Rusisë paraqitën pamje satelitore për të cilat thanë se tregojnë kamionë që ngarkohen me naftë në tokat e kontrolluara nga Shteti Islamik në Siri dhe Irak dhe që dërgohen në Turqi. Erdogan mohoi akuzat.
Zyrtarë të lartë ushtarakë të Rusisë paraqitën sot (2 dhjetor) fotografi satelitore për të mbështetur akuzat e tyre se Turqia është blerës i naftës nga Shteti Islamik dhe rrjedhimisht, financuese e kësaj organizate terroriste, duke shtuar se vetë familja e presidentit Recep Tajip Erdogan është e përzjerë në këtë tregti.
Duke folur para gazetarëve, zëvendësministri i mbrojtjes i Rusisë Anatoly Antonov tha se fotot satelitore të disponuara prej vendit të tij tregojnë rrugëtimin e naftës nga territoret e kontrolluara nga Shteti Islamik për te portet dhe rafineritë e Turqisë. Por pyetur nëse dispononin prova për pretendimin se vetë familja e Erdogan qe përfituese nga kjo tregti, Antonov tha se është afër mendësh që një aktivitet i tillë në shkallë të gjerë nuk mund të kryhet pa pjesëmarrjen e niveleve më të larta të qeverisjes turke.
I gjendur në një vizitë në Katar, Erdogan i hodhi poshtë akuzagt si shpifje.
Turqia dhe Rusia janë në mosmarrëveshje të thella që nga java e kaluar, kur ushtria turke rrëzoi një avion lufte rus që po bombardonte forcat rebele në Siri, pranë kufirit me Turqinë.