Pas protestave të ish të përndjekurve politik, qeveria shqiptare është shprehur se do të mbështesë përpjekjet e Komisionit Ndërkombëtar për Njerëzit e Humbur për të gjetur eshtrat e 6,000 viktimave të periudhës së regjimit komunist.
Qeveria shqiptare organizoi një konferencë donatorësh të premten për të mbështetur Komisionin Ndërkombëtar për Njerëzit e Humbur, KNNH, në përpjekjen e tij për të gjetur eshtrat e rreth 6,000 viktimave që u ekzekutuan gjatë komunizmit ose vdiqën në burgje dhe kampet e internimit.
Drejtori i Institutit të Ish të Përndjekurve Politik, Bilal Kola, i tha BIRN që konferenca kishte për qëllim të siguronte fondet e nevojshme, në mënyrë që KNNH-ja të fillonte punë në dy vende ky dyshohet se një numër i madh njerëzish të ekzekutuar gjatë komunizmit është varrosur.
“Ne kemi dy projekte pilot që identifikojnë vendet ku kërkimet për eshtrat do të fillojnë. Një nga këto është një ish kamp përqendrimi në Ballsh dhe zona tjetër është mali i Dajtit ku shumë ekzekutime u kryen gjatë komunizmit,” ai tha.
Kjo nuk është hera e parë kur qeveria shqiptare ka kërkuar ndihmën e KNNH-së për të gjetur ose identifikuar eshtrat e personave të ekzekutuar gjatë komunizmit.
Në Prill të 2010-ës qeveria e mëparshme e ftoi formalisht KNNH-në të asistojë në rritjen e kapaciteteve të institucioneve vendore për identifikimin e eshtrave të viktimave nëpërmjet AND-së.
Por pas dy vitesh negociatash dhe disa sugjerimeve të dhëna nga KNNH-ja për qeverinë shqiptare u bë shumë pak progres.
“Në 2012 kryeministri shqiptar sinjalizoi që qeveria do të mblidhte një konference donatorësh për të mbështetur punën ë KNNH-së, por nuk ka pasur më shumë progres,” shkruhet në faqen e internetit të organizatës.
Të enjten një grup ish të përndjekurish politik u përplas me policinë përpara parlamentit. Disa vezë u hodhën drejt makinës së një deputeti në protestë të “harresës së politikës.” Protestuesit kërkuan kompensim financiar për vitet e burgut dhe gjetjen e eshtrave të viktimave të komunizmit.
Kreu i Unionit Kombëtar të Ish të Përndjekurve Politik, Besim Ndregjoni, i cili drejtoi protestën i tha BIRN që liderët politik duhet të merrnin masa të menjëhershme.
“Ndryshe do të ftojmë komunitetin tonë nga e gjithë Shqipëria dhe do të organizojmë protesta më të mëdha, me forma dhe mjete të ndryshme,” ai tha.
Sipas Shoqatës së ish të Përndjekurve Politik 5577 burra dhe 450 gra u ekzekutuan gjatë regjimit komunist për krime politike nga viti 1946 deri në vitin 1991. Dhjetëra mijëra të tjerë u burgosën në kampet e punës.