Moti i ftohtë po e bën jetën më të vështirë për refugjatët në kampin tranzit pranë pikës kufitare në Maqedoninë jugore me Greqinë, ku rreth 2000 refugjatë kalojnë çdo ditë.
Kryqi i Kuq dhe organizata të tjera humanitare që punojnë në Maqedoni thonë se fëmijët refugjatë po sëmuren gjithnjë e më shumë për shkak të rënies së temperaturave të motit.
Kampi kryesor i refugjatëve për migrantët në Maqedoni gjithashtu për përjeton mungesë të energjisë elektrike gjë që e komplikon më tej çështjen.
Pasi mbërrijnë nga Greqia, shumë refugjatë qëndrojnë vetëm për disa orë në kampin maqedonas, marrin çaj dhe veshje dimri, si dhe batanije përpara se të hipin në trenat tranzit në veri të vendit në kufi me Serbinë.
Autoritetet i grupojnë refugjatët në grupe prej rreth 50 personash. Ata lënë të kalojnë të parët gratë, fëmijët, të moshuarit dhe të sëmurët.
“Policia po bën një punë të mirë, duke organizuar refugjatët. Por ne do të ishim mirënjohës nëse ata respektonin të drejtat e tyre plotësisht dhe nuk përdorin forcë,” tha Mohammad Arif, nga Agjencia e OKB për Refugjatët, UNHCR, në Maqedoni.
Dy ditë më parë tensionet në pikën e kufirit afër kampit u rritën pasi policia greke filloi të largojë migrantët protestues që nuk lejoheshin të hynin në Maqedoni nga kufiri.
Vendi lejon hyrjen vetëm të refugjatëve nga tre shtete në luftë: Siri, Afganistan dhe Irak.
Ndërkohë ushtria ka filluar ngritjen e një gardhi në pikën e dytë më të madhe të kufirit me Greqinë, Medzitlija, pasi disa migrantë filuan të përdornin pikën për të hyrë ilegalisht.
Maqedonia tashmë ka ngritur një gardh tre kilometra në kufirin pranë Gevgelijës.
