Zëvendës presidentja e Parlamentit Europian, Ulrike Lunacek tha se ministri i jashtëm Hashim Thaçi bëri gabim që ia hodhi fajin BE-së për dështimin e hyrjes në regjimin pa viza të Kosovës, sepse Prishtina ka ende shumë punë për të bërë.
“Fajësimi i BE-së është mënyra e gabuar, nuk do të sillte asnjë produkt dhe jam krejtësisht kundër me të,” tha Lunacek për BIRN të dielën.
“Kam të njëjtin zemërim si shtetasit e Kosovës se raporti më i fundit nuk ofroi rezultatin e pritur por ne jemi më afër se kurrë suksesit,” shtoi ajo.
Pas dështimit të Prishtinës në sigurimin e një regjimi pa viza nga BE-ja muajin e shkuar, Thaçi akuzoi Brukselin për diskriminim kundër Kosovës, vendit të vetëm në Ballkan shtetasit e të cilit kanë nevojë për viza që të hyjnë në zonën Shengen të BE-së.
“E konsideroj një provokim të rëndë dhe një rezultat të paaftësisë dhe mungesës së vullnetit politik të lidershipit të Brukselit. Është një fyerje direkte për shtetasit e Kosovës,” tha ai të enjten e shkuar.
Kryeministri i Kosovës, Isa Mustafa, këmbënguli në një takim qeveritar se vendi ka përmbushur çështjet teknike për liberalizimin e vizave dhe e quajti dështimin për të hyrë në klubin pa viza si “vullnetin politik të BE-së”.
Por Lunacek i tha BIRN se qeveria e Prishtinës duhet të përmbushë ende tetë kushte dhe se 28 shtetet anëtare duhet ende të binden se Kosova e meriton liberalizimin.
“Parlamenti Europian do të mbështesë me forcë Kosovën por ne gjithashtu duhet të bindim 28 ministra të brendshëm, për shkak të situatës së BE-së me refugjatët tani, kjo është e vështirë,” tha Lunacek.
“Protestat dhe ndjenjat negative ndaj BE-së e bëjnë më të vështirë për mua dhe mbështetës të tjerë të Kosovës të punojnë për një imazh pozitiv, që është shumë i nevojshëm për liberalizimin e vizave,” shtoi ajo.
Në shkurt 2015, Agjencia e Inteligjencës në Kosovë raportoi se 50,000 kosovarë kërkuan azil në vendet e BE-së gjatë javëve të para të 2015.
BE-ja ka paralajmëruar vazhdimisht se edhe vendet që përfitojnë nga liberalizimi i vizave – si Shqipëria – mund të përjashtohen nga regjimi pa viza për shkak të numrit të lartë të azilkërkuesve.