Avokati i Bekim Mulollit dhe motra e tij thonë se i dyshuari që nuk është paraqitur në gjyq mund të ketë vdekur në Siri, ndërsa prokuroria pretendon se ai fshihet në Serbi.
Një gjykatëse në Kosovë tha se ajo beson se një i dyshuar për terrorizëm, që do të gjykohej, mund të ketë vdekur duke luftuar në Siri.
Bekim Mulolli kishte detyrimin në paraqitej në gjykatë disa javë më parë dhe mungesa e tij ka rritur dyshimet rreth vendndodhjes së tij dhe nëse ai është ende gjallë.
“Ka fjalë se Bekim Mulolli është vrarë në Siri, por nuk mund ta konfirmojmë këtë sepse nuk ka një raport zyrtar të policisë për çështjen,” tha gjykatësja Nora Bllaca.
Avokati i Mulollit, Mentor Neziri i tha BIRN se ai kishte marrë gjithashtu informacion të pakonfirmuar se klienti i tij kishte vdekur në Siri.
Motra e tij pretendoi të njëjtën gjë për BIRN në telefon. “Ai ka ikur një herë e mirë, nuk ka nevojë të telefononi më,” tha jo e pyetur nëse i vëllai kishte vdekur në Siri.
Mullolli u arrestua fillimisht në vitin 2013 për sulm të dy misionarëve katolikë nga SHBA. Ai pranoi krimin dhe shprehu pendesë, por më pas prokuroria shtoi ndaj tij akuzat e terrorizmit.
Ai kaloi nga burgu në arrest shtëpie me kërkesë të prokurorisë për rrethana të paqarta.
Prokuroria nga ana tjetër pretendon se Mulolli nuk ka vdekur por fshihet në Serbi me gruan, megjithëse ende nuk janë gjetur prova që ta mbështesin këtë pretendim.
Ndërkohë, gjyqi i pesë të dyshuarve për terrorizëm të martën në Prishtinë u shty pasi policia nuk arriti të sillte të pandehurin Ardian Mehmeti në gjykatë.
Mehmeti, Valon Shala, Genc Selimi, Nuredin Sylejmani dhe Musli Hyseni gjykohen për pjesëmarrje në organizata terroriste, drejtim të grupit terrorist, posedim të paligjshëm të armëve të zjarrit, posedim të eksplozivëve dhe përgatitje të sulmeve terroriste.
90 persona janë arrestuar në Kosovë që nga shtatori 2014 me akuzat e anëtarësisë në grupe terroriste si ISIS dhe Al-Nusra.
40 janë aktualisht në gjyq. Vlerësimet më të fundit të autoriteteve thonë se rreth 300 kosovarë i janë bashkuar ISIS dhe Al Nusra.
