Burimet e inteligjencës besojnë se rreth 11 burrat e arrestuar të martën në Bosnje po planifikonin një sulm terrorist në Ditën e Vitit të Ri, për shkak se ideologjia e tyre është kundër kësaj dite.
Marina Zoviç, zëdhënësja e policisë federale të Bosnjes, që kreu mësymjen, tha se ishin arrestuar 11 burra për lidhje me terrorizmin dhe grupet terroriste.
“Ata dyshohen për nxitje dhe përgatitje të një veprimi kriminal si dhe rekrutimin e njerëzve që të luftonin jashtë shtetit,” tha Zoviç.
Emrat e të dyshuarve nuk janë zbuluar zyrtarisht por burime nga prokuroria boshnjake – që urdhëroi arrestimin – tha se ata ishin Kemal Muriç, Adis Kesan, Elvir Muratoviç Elvir Masiç, Admir Ahmetoviç, Semir Salkovic, Zulfo Alajbegovic, Bilal Dervisiç, Edin Tabakoviç, Darko Peco dhe Nermin Cuprija.
Zëdhënësi i prokurorisë boshnjake Boris Grubesiç tha për BIRN se policia do t’ia dorëzojë personat prokurorëve të mërkurën për t’i marrë ata në pyetje dhe për të vendosur nëse do të paraqesë një kërkesë për burgosje deri të enjten.
Prokuroria tha se rreth 15 persona ishin shënjestruar në total dhe mes 11 të arrestuarve, u kërkuan edhe disa shtëpi dhe dy “vende të grumbullimit fetar të personave radikalë”.
“Gjatë bastisjeve gjetëm dëshmi të caktuara që tregojnë lidhjet me strukturat e ISIS”, tha Grubesiç.
Ai shtoi se një pjesë e bastisjeve u zhvillua në Rajloviç, në periferi të Sarajevës, ku një burrë qëlloi për vdekje dy ushtarë një muaj më parë.
Më 18 nëntor, Enes Omeragic, 32 vjeç, vrau dy ushtarët pranë një dyqani bastesh në Rajloviç para se të kryente vetëvrasje.
Sulmi u quajt një akt terrorist, edhe pse nuk janë gjetur lidhje midis Omeragiç dhe rrjeteve terroriste që veprojnë në Bosnjë.
Eksperti boshnjak i sigurisë Vlado Azinoviç tha se sulmi i fundit ishte qartësisht “një akt parandalues”.
“Policia dhe prokuroria ka informacion se të paktën disa të dyshuar mund të bëjnë ‘diçka konkrete’ në fund të vitit, duke marrë në konsideratë faktin se njerëzit nga ky qark ideologjik zakonisht janë kundër festimit të Vitit të Ri, ndaj ka arsye që ata të planifikojnë diçka kundër festimit ku mund të jenë mbledhur një grup i madh njerëzish,” tha ai,
Mediat boshnjake gjithashtu citoi burime të paidentifikuara në shërbimet e inteligjencës, që kanë pohuar se te arrestuarit po planifikonin një sulm në ditën e Vitit të Ri.
Prokuroria gjithashtu tha se bastisja ishte rezultat i punës së vetëm një prokurori që punon në çështjet e terrorizmit, dhe se pasi tetë prokurorë të rinj të fillojnë punën në janar, “puna do të bëhet shumë më e shpejtë dhe efikase”.
“Prokurorët e rinj do të ndihmojnë në koordinimin e punës dhe koordinimin e agjencive policore. Në shumicën e rasteve, aktivitetet përfshijnë një numër të madh të të dyshuarve që kanë lidhje me veprimtari terroriste dhe radikalizimin, si dhe organizimin e udhëtimit të shtetasve boshnjakë për të luftuar në Siri apo Irak,” shpjegoi Grubesiç.
Prokuroria kishte paralajmëruar prej muajsh se ajo nuk ka forca në numër për të trajtuar rastet e terrorizmit siç duhet, gjë që është arsyeja përse Këshilli Prokurorial dhe ai i Lartë Gjyqësor emëroi tetë prokurorë të rinj për të punuar në këto hetime.