Lideri serb i Partisë Radikale dhe njëkohësisht i pandehur për krime lufte, Vojisllav Sheshel ka bërë thirrje te serbët në SHBA që të mbështesin kandidatin e mundshëm të Republikanëve, Donald Trump, në zgjedhjet presidenciale.
“I bëj thirrje vëllezërve serbë që jetojnë në SHBA të mbështesin fort kandidatin e Partisë Repubikane Donald Trump në zgjedhjet e ardhshme presidenciale,” shkroi Shesheli në adresën e tij në Tëitter të dielën.
Manjati miliarder Trump, që aktualisht po konkurron për nominim si kandidati i Partisë Republikane në zgjedhjet e nëntorit 2016, ka bërë disa deklarata gjatë fushatës së tij që janë kritikuar si anti-myslimane.
Shefi i Partisë Radikale serbe, Shesheli, që po gjykohet për krime lufte në Bosnje, Kroaci dhe Serbi, gjithashtu është kritikuar si anti-mysliman në raste të ndryshme.
Në dhjetor, pas të shtënave vdekjeprurëse në Kaliforni që u lidhën me mbështetjen e dyshuar të vrasësve për Shtetin Islamik, Trump tha se ai donte “një ndalim total të hyrjes së myslimanëve në SHBA derisa përfaqësuesit e vendit të kuptojnë se çfarë dreqin po ndodh”.
Sheshel ndërkohë ka mbështetur prej kohësh idenë e një “Serbie të Madhe” dhe në vitin 2013 e përshkroi Bosnjën si “padyshim serbe”.
“Nëse fundamentalistët myslimanë nuk e pëlqejnë këtë, mund të marrin çantat dhe të largohen,” tha ai.
SHBA-ja është shtëpi e një milionë serbëve-amerikanë, ku diaspora më e madhe serbe jeton në Çikago.
Shefi i Partisë Radikale serbe, Sheshel është akuzuar për nxitje të vazhdueshme të tensioneve etnike që kur u kthye në Serbi në nëntor 2014, pasi mori lirim të përkohshëm për baza humanitare të trajtimit të kancerit nga Gjykata Ndërkombëtare e Krimeve për ish-Jugosllavinë.
Që prej kthimit të tij, ai ka drejtuar protesta nacionaliste dhe ka bërë një seri deklaratash që kanë zemëruar viktimat e luftës.
Ai gjithashtu ka thënë disa herë se nuk do të kthehet në ICTY vullnetarisht për vendimin e gjyqit të tij.
Megjithë këtë shkelje të kushteve për lirimin e tij, gjykata e OKB nuk mundi të gjente një mekanizëm që ta detyronte qeverinë serbe ta kthente atë në Hagë. Serbia ka pretenduar se shëndeti i Sheshelit është përkeqësuar aq shumë saqë ai nuk mund të udhëtojë.
Vendimi për gjyqin e tij pritet në fund të këtij viti.
