Jasminka Ramiç u dënua me tre vite burg për financim dhe mbështetje materiale të terroristëve të Shtetit Islamik.
Një gjykatë në Saint Louis në SHBA dënoi me tre vite burg një imigrante 43-vjeçare, Jasmina Ramiç, për mbështetje financiare ndaj terroristëve të ISIS.
Ramiç më 28 shtator 2015, pranoi se i kishte dhënë 700 dollarë një imigranti boshnjak që më pas ia dha paratë një ndërmjetësuesi në Stamboll.
“E kuptoj që gabova dhe bëra diçka që nuk duhej,” i tha Ramiç gjykatëses Catherine Perry, thuhet në raportime.
Ramiç ishte një banore e Rockford, Illinois, që fitoi shtetësinë amerikane në vitin 2006.
Sipas medias amerikane, Ramiç dhe bashkëshorti i saj po përjetonin vështirësi financiare dhe burimi i saj i vetëm i të ardhurave ishte një cek i përmuajshëm i sigurisë sociale prej 578 dollarësh. Në vitin 2012 ata deklaruan falimentin.
Ajo u arrestua më 11 shkurt në Gjermani, ku ishte larguar për t’iu shmangur arrestit në SHBA.
Ramiç është një nga grupi i gjashtë shtetasve amerikanë nga Bosnja që u arrestuan në shkurt 2015 dhe u akuzuan për konspiracion në mënyrë që t’i ofronin terroristëve mbështetje materiale dhe burimore, përfshirë paratë dhe pronat, shkruhej në aktakuzë. Ajo ishte e vetmja që e pranoi fajin.
Sipas aktakuzës, ajo dhe anëtarë të tjerë të këtij grupi – Ramiz Hodziç, Sedina Hodziç, Nihad Rosiç, Mediha Salkiceviç dhe Armin Harceviç përdorën Facebook, Paypal, Western Union dhe Shërbimin Postar Amerikan për të koordinuar pagesat që shkonin rreth 8.500 dollarë dhe furnizime materiale te ndërmjetësuesit jashtë shtetit.
Marrësi i ndihmës ishte Abdullah Ramo Pazara, një tjetër shtetas amerikan me origjinë boshnjake, që u largua nga SHBA në vitin 2013 dhe iu bashkua luftës në Siri, ku ai vdiq, sipas qeverisë amerikane.
Grupi gjithashtu dërgoi mbështetje financiare te familjet nga Bosnja dhe Mali i Zi që kishin të afërm që luftonin për brigadat islamike në Siri dhe Irak, shkruhej në aktakuzë.
Sipas autoriteteve boshnjake, të paktën 217 shtetas të Bosnjës shkuan në luftë në Siri gjatë tre viteve të fundit dhe 26 prej tyre raportohet se kanë vdekur atje.
