Lideri i opozitës maqedonase Zoran Zaev i tha BIRN në një intervistë se përgatitjet nuk kanë përfunduar ende për zgjedhje të lira dhe të drejta në prill, që synojnë t’i japin fund krizës politike në vend.
Zaev e akuzoi rivalin e tij politik, kryeministrin prej një kohe të gjatë, Nikola Gruevski, se po i bën bisht afatit kohor të rënë dakord për dorëheqjen e tij në marrëveshjen e ndërmjetësuar nga BE për t’i dhënë fund krizës politike të Maqedonisë dhe për të nisur reformat e tjera të nevojshme për zgjedhje të drejta parlamentare që u caktuan në marrëveshje.
“I gjithë publiku maqedonas e di se kushtet për zgjedhje të drejta dhe demokratike nuk janë plotësuar,” tha lideri i Social Demokratëve në opozitë për BIRN.
Zaev argumentoi se sipas marrëveshjes së krizës, Gruevski duhej të kishte hequr tashmë dorë nga pushteti për të lejuar zgjedhjen e një kryeministri të ri deri më 15 janar dhe të mos pritej mbërritja e Komisionerit Europian të Zgjerimi Johannes Hahn të premten për t’u tërhequr.
Një tjetër detyrë e paplotësuar për t’i hapur rrugën zgjedhjeve të drejta ishte kontrolli i listave zgjedhore që sipas shumë vëzhguesve dhe opozitës përmban votues të rremë të përdorur për të manipuluar rezultatin e zgjedhjeve në favor të Gruevskit në të shkuarën.
“Çdo ligjvënës e di se me 1.8 milionë votues të regjistruar në zgjedhjet e shkuara, Maqedonia nuk mund të shkojë në zgjedhje. Ka më pak se 1.6 milionë banorë në vend, prej të cilëve 400,000 mijë janë minoren dhe ne kemi ID false dhe votues të dyfishtë. Kjo duhet pastruar,” tha Zaevi.
Një tjetër pikë kyçe është reforma e medias, që Zaev argumenton do të ketë një efekt direkt mbi zgjedhjet.
“100 ditë përpara zgjedhjeve duhet të krijohet një skuadër e re ekspertësh dhe një kryetar i ri i Agjencisë për Shëbrimet Audio-Vizive që të presim nga ky organ reagimin ndaj fjalëve të urrejtjes, përfaqësimit të pabarabartë dhe dredhimit nga standardet profesionale,” tha Zaev.
“Ndryshime personeli janë të nevojshme në MRTV [shërbimin televiziv shtetëror] dhe MIA [agjencinë kombëtare të lajmeve]. E gjitha kjo duhet të bëhet në jo më pak se 100 ditë përpara zgjedhjeve, që sipas marrëveshjes fillestare mbaron më 15 janar. Kjo është e pamundur për t’u arritur,” këmbënguli ai.
Ai shprehu shpresën se mbërritja e komisionerit të BE Hahn të premten do të ndihmojë në qartësimin e çështjeve.
“Mbërritja e tij është një ndihmë e madhe dhe ne presim që kjo t’i bëjë datat e zbatimit të marrëveshjes Przino më precize” tha ai.
Në lidhje me çdo shtyrje të mundshme për datën e planifikuar të zgjedhjeve më 24 prill, Zaev tha se Komisioni Zgjedhor duhet të ketë të drejtë fjale në program.
“Komisioni Zgjedhor është tani institucioni më autoritar që duhet të bëjë planet dhe përllogaritjet… Ata duhet të përputhin të gjitha fotot nga dokumentet biometrikë për të anuluar dyfishimin e fotove, të kontrollojnë referencat e databazës dhe të kryejnë kontrolle në terren për listën zgjedhore,” tha ai.
Ai tha se të gjitha mundësitë për datën zgjedhore mbeten të hapura nga prilli deri në shtator.
“Le ti lajmërojnë datat konkrete kur të kemi një situatë të mirë zgjedhore dhe një marrëveshje mbi median që do të zbatohet… kjo do të përcaktojë datën zgjedhore,” tha ai.
Kriza politike në Maqedoni rrotullohet rreth dyshimit për përgjim masiv të popullatës nga Gruevski. Sipas provave të opozitës publikuar në shkurt të vitit të shkuar 20,000 persona janë përgjuar.
Zaev i tha BIRN se materiali i përgjuar, që partia e tij së fundmi ia ka dorëzuar prokurores speciale për hetim të çështjeve të mbikëqyrjes, ka akoma më shumë skandale korrupsioni që përfshijnë shuma me miliona euro.
“Jam i bindur që ka raste të tjera, po aq të mëdha dhe skandaloze sa ‘tarifat kineze’”, tha ai, duke iu referuar pretendimeve se Gruevski ka marrë ryshfete të mëdha në një marrëveshje me firmat kineze për ndërtimin e autostradave.
Zaev tha se ai ishte i bindur se sapo kushtet të piqeshin do të kishte zgjedhje me të vërtetë të lira dhe partia e Gruevskit VMRO DPMNE do të humbasë.
“Shtetasit duhet ta dinë se Gruevski nuk është më në pushtet dhe se koha e tij ka mbaruar,” tha ai.
