Koalicioni qeverisës po mbështet ministrin e jashtëm Hashim Thaçi si kandidatin e tyre të parapëlqyer për të zëvendësuar presidenten aktuale Atifete Jahjaga, mandati i së cilës përfundon në prill.
Partia Demokratike e Kosovës në qeveri kandidoi kryetarin e saj Hashim Thaçi si kandidat për president ndërsa aleati i saj në qeveri, Lidhja Demokratike e Kosovës, tha se ajo do ta mbështesë këtë kandidaturë.
Kushtetuta e Kosovës thotë se presidenti i ardhshëm do të duhet të zgjidhet nga deputetët 30 ditë para mbarimit të mandatit të presidentit aktual. Presidentja Atifete Jahjaga do ta mbyllë mandatin e saj më 7 prill. Presidenti në Kosovë zgjidhet nga kuvendi.
“Mund të ndodhë që nga fundi i shkurtit apo fillimi i marsit ne të kemi presidentin e ri,” deklaroi Basri Musmurati, sekretari i përgjithshëm i Partisë Demokratike të Kosovës për BIRN.
Sipas marrëveshjes mes dy partive në koalicionin qeverisës, PDK do të zgjedhë kandidatin e përbashkët për postin e presidentit. Partneri në qeverisje i PDK, Lidhja Demokratike e Kosovës, (LDK), tha se ajo do ta respektojë marrëveshjen.
“PDK e ka mbajtur premtimin në lidhje me zgjedhjen e Isa Mustafës (nga LDK) si kryeministër i Kosovës kështu që LDK do të mbajë premtimin e dhënë për zgjedhjen e z. Thaçi si President,” deklaroi nënkryetari i LDK-së Lutfi Haziri.
Thaçi, i cili është gjithashtu zëvendëskryeministër në qeverinë aktuale, ka qenë drejtori politik i Ushtrisë Çlirimtare të Kosovës gjatë luftës së viteve 1998-99.
Partia Vetëvendosje në Opozitë deklaroi se do të bëjë gjithçka që ka në dorë për ta ndaluar Thaçin të bëhet president.
“Hashim Thaçi është personi më i papërshtatshëm për t’u bërë president,” deklaroi Zgjim Hyseni nga udhëheqësia e Vetëvendosjes.
“Biografia e tij politike karakterizohet në tërësi nga veprime politike që kanë dëmtuar interesat e vendit. Ai nuk mund të jetë garantues i unitetit të popullit,” deklaroi Hyseni.
Ai tha se Vetëvendosje nuk do të marrë pjesë në seancën parlamentare ku do të votohet presidenti me synimin për të mos lejuar plotësimin e kuorumit të nevojshëm.
“Përkundrazi, ne do të kundërshtojmë zgjedhjen e tij me çdo kusht,” shtoi ai.
Besa Shahini, një analiste nga Prishtina tha se Thaçi ka dështuar si ministër i jashtëm të siguronte anëtarësimin e vendit në UNESCO apo të siguronte marrëveshjen për liberalizimin e vizave me Bashkimin Europian.
“Për çfarë arsyeje ai duhet të promovohet si president tani?” pyeti Shahini.
Ajo pretendoi se partia e Thaçit sakaq ka marrë kontrollin e kaq shumë institucioneve shtetërore dhe ka ndikim të madh mbi presidenten aktuale.
“Nëse Thaçi bëhet president, atëherë kapja e institucioneve të shtetit do të jetë e plotë,” tha ajo.
Teorikisht, presidenti në Kosovë është një figurë mbi palët politike dhe jopartiake.
Atifete Jahjaga u zgjodh presidente në vitin 2011 pasi kishte punuar si zëvendësdrejtuese e policisë së Kosovës. PDK dhe LDK mbështetën kandidaturën e saj në atë kohë.
Ajo qe një kandidaturë me konsensus e mbështetur nga ish ambasadori i SHBA-së në Prishtinë Christopher Dell, në përpjekje të zgjidhjes së krisës politike pasi presidenti i mëparshëm dha dorëheqjen.