Ish-komandanti i Ushtrisë Çlirimtare të Kosovës Sami Lushtaku, i cili ndodhet në burg për krime lufte, hyri në grevë urie pasi një gjyqtar urdhëroi kthimin e tij nga spitali në burg.
Ish-komandanti i UÇK-së Lushtaku, i cili po kryen dënimin e tij në një burg të sigurisë së lartë pranë Podujevës pasi u dënua për vrasje, të martën hyri në ditën e tij të pestë të grevës së urisë në shenjë proteste pasi i është mohuar vazhdimisht kurimi në spital për probleme me zemrën.
Lushtaku, i cili është ende kryetari i komunës Skënderaj pavarësisht se është në burg, e ka nisur grevën e tij të urisë që ditën e premte, tha për BIRN Ministria e Drejtësisë në Kosovë.
Ministria e Drejtësisë tha se Lushtaku ishte në spital në Prishtinë deri më 13 janar, kur gjyqtari nxori një urdhër që ai të kthehej në burg.
“Gjendja e tij shëndetësore po ndiqet vazhdimisht nga stafi mjekësor në burgun e sigurisë së lartë,” tha zyra e shtypit e ministrisë.
Avokati i tij, Arianit Koçi, tha se Lushtaku ka të drejtë sipas ligjeve dhe konventave ndërkombëtare të kërkojë të shtrohet në spital, dhe u shpreh se burgu nuk ka aparaturat e duhura për të trajtuar si duhet problemin e tij.
“Gjendja shëndetësore e Sami Lushtakut mund të përkeqësohet më tej për shkak të disa ditëve që ai ka tashmë që është në grevë urie,” tha Koçi për BIRN.
“Udhëtimet e përditshme për analiza dhe marrja e terapisë po e përkeqëson edhe më shumë gjendjen e tij shëndetësore. Prandaj ai duhet të shtrohet në spital,” tha ai.
Lushtaku u burgos në maj të vitit të kaluar për krime lufte së bashku me dhjetë anëtare të tjerë të celulës “Grupi i Drenicës”, pjesë e UÇK-së gjatë kohës së luftës.
Ai u dënua me 12 vjet burg për vrasjen e një civili shqiptar me plumb në kokë në një vendndodhje të papërcaktuar në shtator të vitit 1998.
Lushtaku ishte në spital dy herë gjatë gjyqit të tij u zhduk përkohësisht të dyja herët.
Në maj të vitit 2014, Lushtaku u arratis nga Qendra Klinike Universitare në Prishtinë së bashku me dy të pandehur të tjerë pasi refuzoi të transferohej në një burg në qytetin verior të Mitrovicës.
Në shtator 2013, ndërsa Lushtaku merrte kujdes mjekësor në Prishtinë, ai u zhduk për disa orë dhe rojat nuk kishin asbnjë informacion mbi vendndodhjen e tij, raportoi gazeta Koha Ditore.
Pas kësaj, Lushtaku u transferua në një burg të sigurisë së lartë me urdhër të një gjyqtari të EULEX-it.
