Social Demokratët në opozitë thanë se të gjitha mundësitë janë të hapura, përfshirë rikthimin në protesta, pasi partitë qeverisëse bënë të hënën presion që zgjedhjet të zhvillohen në prill.
Pasi partitë qeverisëse të Maqedonisë ditën e hënë në mënyrë të njëanshme zgjodhën një qeveri të re të përkohshme në parlament, duke i hapur kështu rrugën zgjedhjeve të parakohshme më 24 prill, lideri i Social Demokratëve të opozitës, SDSM, Zoran Zaev, të martën tha se partia e tij duhet të vendoste ende për përgjigjen e saj.
“Përsa i takon pjesëmarrjes së ministrave nga radhët e opozitës në qeveri dhe në lidhje me lëvizjet tona të ardhshme, bordi dhe komiteti i partisë do të marrin një vendim në ditët në vazhdim,” tha Zaev për mediat.
Anëtarët e lartë të partisë kanë lënë tashmë të kuptohet mundësinë e protestave të ngjashme me ato të mbajtura në gjysmën e parë të vitit të kaluar.
“Shihemi te barrikadat,” postoi në Tëeeter zv/kryetari i SDSM-së, Damja Mancevski.
Ditën e hënë maxhoranca në parlament verifikoi dorëheqjen e kryeministrit Nikola Gruevski, votoi shpërbërjen e parlamentit dhe zgjodhi një qeveri të re të udhëhequr nga sekretari i përgjithshëm i VMRO DPMNE Emil Dimitriev, duke i hapur kështu rrugën zgjedhjeve të reja më 24 prill.
Sipas marrëveshjes së ndërmjetësuar nga BE-ja, figura opozitare duhet të caktohen në poste të ndryshme të kabinetit të përkohshëm qeveritar, por, për shkak të një bojkoti të lajmëruar nga opozita, pjesëmarrja e ministrave të opozitës në qeveri mbetet ende e pasigurt.
Dy ministrat e përkohshëm të caktuar nga radhët e opozitës, Ministri i Brendshëm Oliver Spasov dhe Ministrja e Punës Frosina Remenski, nuk u prononcuan ditën e marftë.
Ata u përfshinë në qeverinë e re të zgjedhur ditën e hënë, por nuk ishin në parlament për të bërë betimet e tyre.
Sipas kushteve të marrëveshjes së krizës të arritur verën e kaluar, opozita duhet të ketë gjithashtu edhe tri zv/ministra, pjesëmarrja e të cilëve është gjithashtu e dyshuar.
Ndërkohë, partia në pushtet informoi shkurtimisht ditën e martë se nëse ministrat e opozitës abstenojnë nga rolet të tyre, kryeministri i përkohshëm do të marrë përsipër punët e tyre në Ministrinë e Brendshme dhe atë të Punës.
Sipas Marko Trosanovski, kreu i Institutit për Demokraci, një think tank, lëvizjet e fundit të partive politike mund ta fusin Maqedoninë në një krizë politike edhe më të thellë.
“Hyrja në zgjedhje kur disa reforma kyçe nuk janë bërë ende është e pakta le të themi e papërgjegjshme. Çfarë më shqetëson në veçanti është se BE-ja po e mbështet këtë vendim. Me zgjedhjet, ne po destabilizojmë veten,” tha Trosanovski.
Ambasada britanike në Shkup tha se më shumë duhet bërë për të siguruar zgjedhje të besueshme, përfshirë pastrimin e listave elektorale, sigurimin e lirisë së medias dhe përfaqësimin e barabartë të partive.
Sipas ambasadës të gjithë partitë kryesore duhet të marrin pjesë në zgjedhjet e ardhshme për një rezultat pozitiv.
Opozita ka paralajmëruar se nuk do të bjerë dakord për zgjedhjet në prill nëse nuk kontrollohen siç duhet listat zgjedhore për votues fals dhe të sigurohet liria e medias.
Shumica e reformave rënë dakord në marrëveshjen e ndërmjetësuar nga BE-ja për t’i dhënë fund krizës politike në Maqedoni nuk janë zbatuar plotësisht ose janë zgjidhur vetëm formalisht, megjithëse afatet përfundimtare janë kaluar prej kohësh.