Mbështetësit e opozitës protestuan në Podgoricë të dielën kundër qeverisë, ndërkohë që në parlament pritet të kryhet votimi për një mocion mosbesimi ndaj kryeministrit Milo Gjukanoviç.
Qindra protestues manifestuan në rrugët e Podgoricës duke mbajtur pankarta ku shkruhej: “Ai ka mbaruar” dhe duke bërtitur “Milo hajduti!” në referencë të kryeministrit Milo Gjukanoviç.
Manifestimi u organizua nga aleanca kryesore e opozitës, Fronti Demokratik, kundër qeverisë dhe anëtarëve të saj kryesorë para se parlamenti të votojë të hënën një mocion mosbesimi ndaj qeverisë.
Fronti i bëri thirrje depitetëve të opozitës të votojnë kundër qeverisë së Milo Gjukanoviçit, i cili është akuzuar për korrupsion, praktika jodemokratike dhe mashtrime elektorale.
Aleanca e krahut të djathtë, e cila përbëhet më së shumti nga parti pro-serbe pritet të organizojë një miting tjetër në të njëjtën kohë kur parlamenti do të fillojë të debatojë mocionin kundër qeverisë.
Aleanca tha se nëse deputetët e opozitës mbështesin qeverinë të hënën, ata efektivisht do të votojnë kundër demokracisë, interesave më të rëndësishme të shtetit dhe do të votojnë kundër qytetarëve.
Udhëheqësi Partisë së Punëtorëve në opozitë, Janko Vucinic, i bëri thirrje turmës të mblidhen përreth parlamentit në kohën kur do të votohet mocioni.
Mes protestuesve u shpërndanë kartonë të gjelbër dhe të kuq në mënyrë që ata të tregojnë votën në mënyrë simbolike gjatë protestës.
Udhëheqësi i partisë proserbe NOVA, Andrija Mandic, tha se Mali i Zi aktualisht “qeveriset nga disa ambasada të huaja”.
“Qytetarët e Malit të Zi duhet ta ndryshojnë këtë situatë. Ne nuk duhet të jemi të nënshtruar,” tha ai.
Opozita deklaroi se nëse Gjukanoviçi do të rrëzohet të hënën, opozita do ta pezullojë fushatën e saj të protestave që ka nisur që nga shtatori i kaluar, do të deklarojë fitoren dhe do të ftojë partitë e tjera në bisedime për një qeveri të përkohëshme.
Gjukanoviçi kërkoi një votë besimi mbi qeverinë e tij më 19 dhjetor 2015.
Kryeministri që e ka drejtuar Malin e Zi që nga viti 1991 si kryeministër apo si president, ka akuzuar se protestat e opozitës synojnë të bllokojnë anëtarësimin e këtij vendi në NATO si dhe se Rusia është prapa kuintave në organizimin e protestave.
“Janë ngritur pikëpyetje nëse qeveria e ka mbështetjen e parlamentit,” deklaroi Gjukanoviç në dhjetor.
“Ne pritën sa të plotësohej puna që, sipas mendimin tonë, qe në interes kombëtar,” tha ai duke iu referuar ftesës së NATO-s për anëtarësimin e kombit të vogël me 650 mijë banorë në Aleancë.
Mali i Zi ka një komunitet të madh serbësh, të cilët janë të lidhur tradicionalisht me Rusinë. Rusia kundërshton ashpër zgjerimin e NATO-s drejt lindjes.
Në muajtë e fundit, opozita ka bërë thirrje për dorëheqjen e Gjukanoviçit ndërsa policia është përleshur me protestuesit që kërkojnë zgjedhje të parakohëshme.
Qeveria e Gjukanoviçit e humbi shumicën në parlament pasi partia e tij, Partia Demokratike e Socialistëve, pati mosmarrëveshje me koalicionin në qeveri, Partia Socialdemokrate.
Kjo e fundit sakaq ka deklaruar se nuk do të votojë në favor të kryeministrit. Gjukanoviçi për rrjedhojë ka nevojë për një aleat të ri mes opozitës, e cila është e përçarë thellë për të krijuar një maxhorancë të re.
Nëse maxhoranca e re nuk sigurohet, atij do t’i duhet të thërrasë zgjedhje të parakohëshme por mund të qëndrojë në postin që ka deri sa të krijohet një qeveri e re.
Zgjedhjet mund të kryhen në vjeshtën e vitit 2016.