Pas djegies së dhjetë barakave në zonën e Shkozës në Tiranë, familjet e pastreha u përleshën me forcat e policisë ndërsa tentuan të zënë hapësirat bosh të kateve të para të një blloku me banesa sociale të ndërtuara nga shteti, hapësira që qëndrojnë bosh tashmë prej pesë vjetësh.
Një shkëndijë elektrike nga një nënstacion në zonën e Shkozës në Tiranë shkaktoi djegien e dhjetë barakave të familjeve të varfra rome, të cilat, pasi refuzuan ofertën e Bashkisë së Tiranës për t’u strehuar në çadra të ofruara nga bashkia pranë Qendrës Kombëtare të Emergjencave në Tufinë, tentuan të zënë disa mjedise bosh te një bllok pallatesh shtetërore fare pranë barakave të djegura, thanë për BIRN disa aktivistë në vendngjarje.
Policia e shtetit bllokoi hyrjen e bllokut të apartamenteve sociale ndërsa familjet e pastreha hodhën gurë në drejtim të policisë dhe thyen xhamat e kateve të para në një pallati shtetëror.
Një përfaqësues i Bashkisë së Tiranës i pati ofruar më herët familjeve që humbën barakat e tyre nga zjarri mundësinë për strehim me çadra të bashkisë në një ish bazë ushtarake pranë fshatit Tufinë në periferi të Tiranës, por familjet e refuzuan këtë ofertë pasi thanë se kishin frikë se do të mbeteshin përgjithmonë në Qendrën Tranzitore të Emergjencave.
Bashkia e Tiranës kritikoi dhunën, që sipas saj, u nxit nga disa përfaqësues të Partisë Demokratike ndërsa një aktiviste për të drejtat e njeriut u filmua duke i kërkuar një përfaqësuesi të PD-së të largohej dhe të mos e shfrytëzonte ngjarjen politikisht.
“Deri në sqarimin e plotë të ngjarjes, Bashkia e Tiranës, në bashkëpunim edhe me Prefektin e Tiranës, ka ngritur disa çadra të reja pranë Qendrës Tranzitore të Emergjencave në Turinë për strehimin e përkohshëm të familjeve të prekura nga zjarri, deri në gjetjen e një zgjidhjeje të qëndrueshme për strehimin e tyre afatgjatë,” tha Bashkia në një njoftim për shtyp.
Aktualisht grupi i familjeve që humbën barakat nga zjarri i ditës së sotme është shpërndarë ndërsa policia është në vendngjarje.
Një bllok pallatesh me rreth 400 apartamente u ndërtua pesë vjet më parë në periferi të Tiranës si një program për strehimin e familjeve të varfra të kryeqytetit. Apartamentet sociale mbetën bosh dhe të pashfrytëzuara për shumë vite, të bllokuara nga mosmarrëveshjet politike mes Partisë Demokratike dhe Partisë Socialiste në Këshillin Bashkiak të Tiranës. Vetëm pas zgjedhjeve të vitit të kaluar, kur Partia Socialiste mori kontrollin edhe të administratës, edhe të këshillit bashkiak, një pjesë e apartamenteve sociale filluan të vihen në dispozicion të familjeve në nevojë, por një numër i konsiderueshëm banesash janë ende bosh, të bllokuara nga procedurat e gjata administrative të strehimit social në Shqipëri.
Ndërkohë, një komunitet familjesh të varfra rome kanë jetuar prej kohësh me çadra fare pranë bllokut me pallate të strehimit social.
Qeveria shqiptare nuk ka aktualisht plane për strehim social në vend dhe fondet për këtë funksion të qeverisë janë planifikuar të pakësohen në mënyrë dramatike gjatë viteve të ardhshme.
Qendra Tranzitore e Emergjencave është një institucion që u krijua në shtator të vitit 2013 për të strehuar përkohësisht disa familje që mbetën të pastreha pasi një tokë ku kishin vendosur çadrat pranë zonës së njohur si Pallati me Shigjeta në Tiranë, mori leje ndërtimi.
Por megjithëse koncepti fillestar qe që qendra të shërbente si ndalesë “tranzitore” drejt një strehimi afatgjatë, që nga viti 2013 deri më sot, vetëm 7 familje janë zhvendosur te banesat sociale ndërsa disa dhjetëra të tjera vijojnë të jetojnë te qendra tranzitore.
Disa javë më parë, Bashkia e Tiranës mori edhe një ish-kapanon tjetër ushtarak pranë Qendrës Tranzitore për të ngritur çadra për disa familje të cilat u përmbytën nga Lumi i Tiranës.
Një pjesë e familjeve të pastreha të Tiranës refuzojnë të shkojnë te Qendra Tranzitore për arsye të ndryshme, mes të cilave, frikës se qendra do të kthehet në një lloj burgu për ta, ose për shkak të armiqësive mes familjeve të ndryshme apo për faktin se fshati Tufinë është larg qendrës së Tiranës, ku shumica e këtyre familjeve nxjerrin jetesën duke grumbulluar materiale të riciklueshme nga mbetjet urbane.
