Prokuroria e Përgjithshme njoftoi të hënën se policia ka arrestuar Drejtorin e Shëndetit Publik në Devoll, Valent Nallbati, si i dyshuar për shpërdorim detyre dhe falsifikim dokumentesh.
“Prokuroria e Korçës ka nisur hetimin pas një letre anonime të mbërritur në zyrën e saj, në të cilën kallëzohej fakti se nga ana e Drejtorit Rajonal po zhvillohej një procedurë fiktive për rikonstruksionin e godinës së institucionit që ai drejton,” thuhet në njoftimin e Prokurorisë së Përgjithshme.
Sipas Prokurorisë, letërshkruesi anonim denonconte faktin që Nallbati po kryente një tender fiktiv për të rikuperuar disa shpenzime personale për punë dekorative që ai kishte kryer në drejtorinë e shëndetit publik. Denoncuesi në fjalë gjithashtu pretendonte që drejtori kishte paracaktuar një kompani nga Kamza si fitues të tenderit.
Pas denoncimit, Prokuroria e Korçës ka kryer një seri verfikimesh nga ku rezulton se Drejtoria e Shëndetit Publik në Devoll ka hapur një tender për rikontruksionin e godinës me vlerë 2.4 milionë lekë, duke shpallur fitues një kompani nga Kamza me vlerë 1.7 milionë lekë. Megjithatë, pas ankesave ndaj procedurës së prokurimit, ajo është anuluar nga enti prokurues. Prokuroria thotë së kompania është shpallur fituese edhe pse ka pasur një ofertë anomalisht të ulët, ndërkohë që vet ndërtesa ishte rikonstruktuar 5 vjet më parë.
Edhe pse është anuluar procedura, Prokuroria e Korçës vlerëson se nga ana e Drejtorit Rajonal, Valent Nallbati, janë konsumuar elementët e veprave penale të “fallsifikimit të dokumentave dhe shpërdorimit të detyrës”. Ajo pretendon se procedurat e tenderit kanë qenë të gjitha fiktive dhe si rrjedhojë anulimi i tij nuk e shfajson drejtorin nga përgjegjësia penale.
Arrestimi i Nallbatit është kryer nga policia mesditën e të hënës, pasi masa e sigurisë “arrest me burg” për drejtorin rajonal është aprovuar nga gjykata.