Prokurorët thonë se një nga katër burrat që u arrestuan pranë manastirit Visoki të Deçanit ka luftuar në Siri ndërsa një tjetër qe kthyer nga Turqia ndërsa përpiqej të bashkohej me konfliktin.
Prokurorët në rajonin e Pejës në Kosovën perëndimore thonë se ata dyshojnë se dy nga katër burrat e arrestuar të shtunën pranë një manastiri serb orthodoks në Deçan janë të lidhur me luftën në Siri.
Sipas prokurorëve, kur të katërt u shfaqën në gjykatën e Pejës, u bë e qartë se njëri prej tyre kishte qenë në konfliktin e Sirisë ndërsa një tjetër qe kthyer nga Stambolli ndërkohë që po përpiqej të bashkohej me konfliktin.
Gjithsesi, prokuroria nuk disponon prova se të dyshuarit synonin të kryenin akte terroriste dhe ata aktualisht janë të akuzuar vetëm për armëmbajtje pa leje.
Policia i arrestoi të katërtit krahas forcave të KFOR që po ruajnë manastirin historik.
Të dyshuarit thonë se kishin dalë për kamping në malet aty pranë, një zonë ku shkohet përmes një rruge që kalon pranë manastirit.
Policia thotë se po i ndiqte të dyshuarit për një copë herë dhe vendosën t’i ndalojnë ata kur ata iu afruan manastirit. Policia thotë se nuk ka prova se të dyshuarit po planifikonin një sulm terrorist.
Sava Janjic, pëgjegjës i manastirit të Visokit, e kritikoi policinë për faktin se nuk e trajtoi incidentin si akt terrorist.
“Deklarata e policisë është patetike dhe nënvlerëson një incident që mund të qe serioz dhe përbën fyerje të logjikës,” tha prifti Janjic.
