Austria po i këshillon vendet e Ballkanit të ulin ndjeshëm valën e refugjatëve, teksa përgatitet për të kufizuar shumë numrin e të ardhurve që do të presë.
Ministri i brendshëm kroat, Vlaho Orepiç, tha se trenat do të fillonin t’i transportonin refugjatët direkt nga kufiri Maqedoni-Greqi në Austri, pa ndaluar në asnjë vend përgjatë rrugës.
Lëvizja erdhi dy ditë pasi Ushtria Maqedonase filloi ndërtimin e një kufiri të ri 37 kilometra të gjatë në kufirin me Greqinë për të parandaluar refugjatët dhe migrantët të hynin ilegalisht në vend.
Kufizimi i ri, më i gjatë dhe më i lartë po ngrihet vetëm 5 metra larg atij ekzistuesit të ngritur në nëntor.
Ministri i jashtëm austriak, Sebastian Kurz tha në Beograd se vendi ii tij veproi për të pakësuar fluksin e refugjatëve dhe se vendet e Ballkanit duhet të bëjnë të njëjtën gjë.
Pasi Austria vitin e shkuar pranoi 90,000 njerëz, ajo po e kufizon numrin në 37,500 në vitin 2016, tha Kurz të martën pas një takimi me kryeministrin serb Aleksandër Vuçiç.
Ministri austriak tha se vendi i tij “ishte në dijeni të pasojave që mund të sillte kjo” te itinerari i migrantëve që kalon nga Greqia në Maqedoni, Serbi, Kroaci dhe Slloveni.
Lëvizjet e reja në Ballkan vijnë pasi një valë e re refugjatësh nga Siria janë mbledhur në kufirin turk, pasi rreth 70,000 njerëz janë larguar nga qyteti kyç i luftës, Alepo.
Maqedonia, bashkë me Serbinë, Kroacinë dhe Slloveninë, prezantuan një politikë kufitare më të ashpër më 18 nëntor.
Që atëherë, ata kanë lejuar vetëm refugjatët nga Siria, Iraku dhe Afganistani të hyjnë në vend.
Autoritetet kanë kthyer në Greqi mijëra njerëz nga vendet e tjera, duke i trajtuar ata si migrantë ekonomikë dhe duke injoruar çdo pretendim të tyrin për azil.
Dy javë më parë, Maqedonia mirëpriti një plan slloven për rritje të sigurisë në kufirin maqedonas me Greqinë, që synonte të kufizonte valën e refugjatëve që kalojnë drejt Europës Perëndimore.
Sipas këtij plani, vlerësuar edhe nga Komisioni Europian, shumica e migrantëve që hyjnë në Greqi do të qëndrojnë aty.
Kjo do të pakësonte presionin mbi vendet e Ballkanit Perëndimor, sidomos në Gjermani dhe Austri.
Shumica e migrantëve që largohen nga konfliktet në Lindjen e Mesme, Azi dhe Afrikë të Veriut po përpiqen të arrijnë në Gjermani ose në vende të tjera të pasura të BE-së. Ballkani shërben vetëm si itinerar transit.
