Pas suksesit të një organizate bamirëse në këtë drejtim, Rumania po lançon programin social që do të ofrojë shpërblim ekonomik për çdo familje të varfër që çon në kopsht fëmijët.
Costi është një 5-vjeçar i dobët por shumë i shkathët me fjalët, i cili me krenari thotë se mund të numërojë deri më 20. Ai thotë se e ka mësuar këtë vetëm sepse ka marrë pjesë në kopsht në Potlogi, një fshat i varfër dhe i shkatërruar në Rumaninë jugore.
Familja e tij, përfshirë katër motrat dhe vëllezërit, jetojnë me ndihmë sociale, si shumë të tjerë në fshat. Asnjë prej prindërve nuk ka një punë të qëndrueshme.
Costi po e ndihmon familjen e tij financiarisht teksa prindërit e tij marrin një kupon ushqimi që vlen 50 lei ose 12 euro çdo muaj për shkak se ai shkon rregullisht në kopsht.
Ndihma vjen nga Ovidiu Ro, një organizatë civile që filloi programin në vitin 2010 me ndihmë nga dhurues individualë dhe kompani. Mbi 2600 fëmijë nga 45 komunitete të varfra kudo në Rumani janë ndihmuar deri më tani.
“Për sa kohë kemi të bëjmë me arsimin, kopshti është themeli. Duam t’i ofrojmë të gjithë fëmijëve të njëjtën mundësi të kenë sukses në shkollë që nga fillimi,” thotë Maria Gheorghiu, një specialiste arsimi që themeloi Ovidiu Ro bashkë me Leslie Haëke, nëna e aktorit Ethan Haëke.
Pjesëmarrja në kopsht është thuajse dyfishuar në të gjitha komunitetet që janë përfshirë, sipas Ovidiu Ro.
Duke parë rezultatet, qeveria rumune ka vendosur të përsërisë programin dhe duke filluar nga mesi i shkurtit, do të financoi një program social të quajtur “Çdo fëmijë në kopsht”.
Rreth 12.2 milionë euro do të investohen vetëm këtë vit për familjet e varfra kudo në vend për të inkurajuar ata të çojnë fëmijët në kopsht.
Programi ofron ndihmë prej 50 lei në muaj për çdo fëmijë nga mosha tre në gjashtë vjeç që vjen nga një familje më të ardhura mujore për anëtar më pak se 284 lei.
Ndihma mund të përdoret për ushqim, veshje, lodra ose artikuj shkollor që ndihmojnë fëmijën në kopsht.
“Ne vlerësojmë se rreth 110 mijë fëmija do të përfitojnë nga programi por vetëm nëse vërtetë shkojnë në kopsht. Ne jemi të sigurt se pjesëmarrja do të shtohet ndjeshëm,” tha zëdhënësi i qeverisë Dan Suciu.
Rumania ka numrin më të lartë të fëmijëve të BE nën moshën 17 vjeç që jetojnë “në rrezik të varfërisë ose përjashtimit social”, me rreth 51 për qind sipas Eurostat. Kjo krahasuar me 27 për qind në të gjithë BE-në.
Varfëria është gjithashtu një nga arsyet kryesore për braktisjen e shkollës në Rumani, që ishte 18.5 për qind për vitin e shkuar, sipas të dhënave zyrtare.