Një vrojtim i kryer së fundmi tregon se kryeministri merr pjesën e luanit në hapësirën mediatike në krahasim me figurat e tjera publike – ndërkohë që besimi te media në përgjithësi është në rënie të vazhdueshme.
Kryeministri bullgar Boyko Borisov është politikani më i dashur për median bullgare, i cili shijon shumë më tepër publicitet se sa çdo figurë tjetër publike, bëhet e ditur nga një studim i financuar nga Programi për Median i Fondacionit Konrad Adenauer dhe Fondacionit për Media dhe Demokraci.
Borisov rezulton se është përmendur në 12 për qind të gati 40 mijë lajmeve të monitoruara gjatë vitit 2015, tri herë më shumë se sa politikani i dytë më i raportuar, presidenti Rosen Plevneliev.
Kryeministri u mbulua gjithashtu në mënyrë pozitive në këto artikuj tri herë më shumë se sa qenë lajmet negative, ndryshe nga shumica e rivalëve të tij të partive të tjera.
“Zakonisht media përqendrohet te personat dhe jo te partitë. Politikanët perceptohen më pozitivisht se sa partitë,” vërejti drejtuesi i kërkimit Orlin Spassov nga Fondacioni për Media dhe Demokraci (FMD).
Fondacioni Adenauer dhe fondacioni bullgar FMD prezantuan raportin e tyre mbi gjendjen e medias në këtë vend si dhe rezultatet e një vrojtimi kombëtar mbi besueshmërinë e publikut te media më 11 shkurt.
Sipas vrojtimit, besimi i publikut në media është më i ulëti i regjistruar në tre vjet. Vetëm 12 për qind e publikut beson se raportimi është i lirë ndërsa dy të tretat mendojnë se media nuk është e pavarur.
Njerëzit ndjehen gjithashtu të keqinformuar nga politikanët dhe 67 për qind kanë mendim negativ për komunikimet e tyre me publikun.
“Nuk ka presion sistematik mbi gazetarët kritikë në Bullgari por forma të ndryshme ndikimi, nga politikanët, pronarët e medias dhe reklamuesit ekzistojnë,” deklaroi Kristian Spar, kreu i Programit për Median në Europën Juglindore.
Arsye të tjera për mungesën e pavarësisë së gazetarëve janë tendenca drejt krijimit të monopolit në sektorin e gazetave, rregullim ligjor inefikas dhe niveli i dobët i vetërregullimit të medias.
Bullgaria është kritikuar në mënyrë të vazhdueshme për mjedisin e dobët mediatik. Vendi renditet i 106 në botë në Indeksin e Lirisë së Medias që kryhet nga organizata Reporterë pa Kufij dhe është në vend të fundit mes 28 vendeve anëtare të BE-së.
Gjithsesi, pavarësisht kritikave, Bullgaria nuk ka marrë masa konkrete për të përmirësuar mjedisin e medias, komentoi Spasov.
FMD vëren gjithashtu dy tendenca kryesore në monitorimin e vet të medias në Bullgari – ngritja e medias tablloide dhe radikalizimin e diskursit mediatik.
“Shoqëria civile, organizatat, aktivistët mendjehapur, sëbashku me klasën politike janë bërë pjesë e imazhit të përgjithshëm të së keqes, gjë që është fuqizuar nga media tablloide,” vërejti Nikoleta Daskalova, analiste për median në FMD.
“Minoritetet, emigrantët dhe refugjatët janë gjithashtu nën sulm,” shtoi ajo.
Daskalova beson se media ka kontribuar në ashpërsimin e ndasive në shoqëri.
“Ajo po shkatërron cilësinë e gazetarisë në të gjitha nivelet e debatit politik në shoqëri,” tha ajo.
