Një projektligj i propozuar nga deputeti Gerti Bogdani i Partisë Demokratike synon të zëvendësojë skemën aktuale të subvencionimit indirekt të energjisë elektrike për të varfërit me një skemë subvencionimi të drejtpërdrejtë.
Propozimi, i cili po diskutohet aktualisht në Kuvendin e Shqipërisë, sugjeron që fondet që qeveria ka vënë në dispozicion të Institutit të Sigurimeve Shoqërore për kompensimin e çmimit të energjisë, të kalojë drejtpërsëdrejti në llogaritë e Operatorit të Shpërndarjes së Energjisë Elektrike, OSHEE, me qëllimin që familjet në ndihmë ekonomike të marrin energji falas në kuotën 90 kWh gjatë muajve të verës dhe 150 kWh gjatë muajve të dimrit.
Relacioni i projektligjit të propozuar nga deputeti Gerti Bogdani argumenton se në këtë mënyrë, familjet në skemën e ndihmës ekonomike do të përfitojnë në këtë mënyrë rreth 118 milionë kWh energji falas me vlerë neto prej 1.12 miliardë lekësh (rreth 8 milionë euro) në vit.
Enti Rregullator i Energjisë miratoi një strukturë të re tarifash në dhjetor të vitit 2014, ku përfshihej faturim me çmimin 9.5 lekë për kWh (pa TVSH) për energjinë e konsumuar nga familjet. Më herët, familjet e paguanin energjinë elektrike në dy fasha, me çmimin 7.7 lekë për kWh për konsumin deri në 300 kWh në muaj dhe 13.5 lekë për kWh për konsumin mbi 300 kilovatorë. Për familjet e varfra, konsumi mesatar mujor i të cilave qe më i ulët se 300 kWh, sistemi i ri i tarifave solli rritje të çmimit të energjisë elektrike me mbi 24 për qind, ndërsa për familjet që kanë konsum më të lartë, sistemi i ri ofroi ulje të konsiderueshme të çmimit final të faturës.
Qeveria miratoi një fond prej rreth 1.5 miliardë lekësh në vit për të kompensuar rritjen e çmimit për rreth 200 mijë familje që bien në kategorinë e familjeve të varfra në skemën e ndihmës ekonomike si dhe familjeve me kryefamiljar pensionist. Sipas kësaj skeme, familjet e varfra do të kompesoheshin me rreth 650 lekë në muaj, e mjaftueshme për të blerë rreth 57 kWh në muaj.
Gjatë vitit të parë të zbatimit, skema e rimbursimit të rritjes së çmimit të energjisë qe pjesë e akuzave të ndërsjellta ndërsa shumë të varfër në të gjithë vendin treguan se e kishin pothuajse të pamundur që ta përfitonin për shkak të procedurave të komplikuara burokratike.
Partia Demokratike dhe ajo Socialiste kanë ndërmarrë në të shkuarën një numër të konsiderueshëm nismash ligjore të karakterit populist për të paraqitur njëra-tjetrën në dritë negative.
Partia Socialiste propozoi gjatë kohës që qe në opozitë një sistem dynivelësh të Tatimit mbi Vlerën e Shtuar duke kërkuar uljen e TVSH-së për mallrat e konsumit të përditshëm nga 20 për qind që është aktualisht në pesë për qind me argumentimin se do të ndihmonte të varfrit. Qeveria e partisë Demokratike në atë kohë e hodhi poshtë propozimin si populist. Pasi erdhi në pushtet në vitin 2013, koalicioni i majtë e la të paprekur TVSH-në.
Partia Demokratike ia “mori hakun” kur propozoi efektivisht të njëjtën skemë në vitin 2015, duke premtuar çmime më të ulëta për mallrat ushqimore. Qeveria e majtë e hodhi poshtë propozimin me argumentin se qe populist dhe i pavlefshëm.
