Parlamenti i Bullgarisë miratoi të enjten amendimet ligjore që autorizojnë ushtrinë të ndihmojë policinë në patrullimin e kufijve të vendit për të ndaluar migrantët e paligjshëm.
Të frikësuar nga rritja e pritshme e numrit të migrantëve që mund të tentojnë të hyjnë në Bullgari gjatë pranverës, deputetët në Bullgari vendosën që ushtarët të lejohen të ndihmojnë policinë në patrullimin e kufirit kundër migrantëve të parregullt.
Të 156 deputetët e pranishëm në seancë të enjten e votuan amendimin e ligjit mbi forcat e armatosura për të zgjeruar kompetencat e ushtrisë në kohë paqeje.
“Ushtria është në gadishmëri të plotë për të marrë pjesë në ruajtjen e kufijve të Bullgarisë,” deklaroi Ministri i Mbrojtjes Nikolay Nenchev pas votimit.
Aktualisht, forcat e armatosura ofrojnë vetëm ndihmë logjistike për policinë kufitare por ndryshimet ligjore do t’i lejojnë ushtarët të patrullojnë kufirin krahas oficerëve të policisë.
Arsyeja kryesore e zgjerimit të fuqisë së ushtrisë është bindja se migrimi do të intensifikohet kur moti të ngrohet, shpjegoi Nenchev.
Zëvendëspresidenti i komitetit parlamentar të mbrojtjes Valentin Radev, i cili mori nismën për ndryshimet ligjore, tha se kryeministri Boyko Borissov pati kërkuar rol më aktiv të forcave të armatosura përgjatë kufijve.
Nenchev tha se ushtria dhe policia duhet të ulen në bisedime tani për të diskutuar si do ta organizojnë bashkëpunimin e tyre në kufi.
Ministrja e Brendshme Rumyana Bachvarova, më 10 shkurt tha se ushtria nuk do të jetë e pranishme në mënyrë të përhershme përgjatë kufijve por do të ofrojë mbështetje në “situata emergjente kritike, kur burimet e Ministrisë së Brendshme nuk do të mjaftojnë për të garantuar siguri të plotë”.
Të enjten, kreu i komitetit parlamentar të mbrojtjes, gjenerali Miho Mihov, i deklaroi radios kombëtare se jo më shumë se katër bataljone do të vendosen në kufi.
Forcat ushtarake nuk do të kenë të njëjtin pushtet me policinë kufitare por do të lejohen të përdorin armët në situata të caktuara.
Miratimi nen për nen i amendimeve do të kryhet brenda tri ditësh.
Bullgaria është kritikuar nga disa grupime për të drejtat e njeriut për ashpërsim të politikave të veta kundër migrantëve përgjatë dy viteve të fundit.
Kritikat qenë të ashpra veçanërisht në tetor 2015, kur një migrant afgan vdiq nga plumbat e qëlluara nga një oficer i policisë kufitare, një ngjarje e paprecedent në Europë që kur kriza e refugjatëve filloi në vitin 2013.
Në raportin e fundit për Bullgarinë të publikuar më 20 janar, Organizata Human Rights Watch akuzoi forcat ligjzbatuese për përzënie në masë të azilkërkuesve dhe migrantëve drejt Turqisë dhe për brutalitet policor.
Bullgaria po ndërton një gardh me tela me gjemba 130 kilometra të gjatë përgjatë kufirit me Turqinë në përpjekje për të ndaluar fluksin e migrantëve.
