Rreth 5 mijë migrantë mbetën të bllokuar në Greqinë e veriut pasi Maqedonia vendosi rregulla më të rrepta për lejimin e hyrjes në këtë vend, rregulla që shkaktuan përleshje mes refugjatëve dhe policisë.
Maqedonia arrestoi dy afganë që u përpoqën të kapërcejnë gardhin me tela me gjemba të ndërtuar përgjatë kufirit me Greqinë ndërsa autoritetet e Shkupit vendosën të ndalojnë hyrjen për afganët dhe refugjatët nga vendet e tjera me përjashtim të sirianëve dhe irakenëve.
Vendimi i Maqedonisë krijoi një barrierë për refugjatët në Greqinë e veriut, ku mijëra migrantë qenë mbledhur me shpresë se do të kalonin për në Bashkimin Europian.
Greqia kritikoi fqinjin e vet verior, duke e akuzuar Maqedoninë se po përpiqet të shmangë përgjegjësinë për krizën e refugjatëve.
“Ne kemi filluar lëvizjet diplomatike… ne besojmë se problemi do të zgjidhet,” tha ministri i ri i punëve të brendshme dhe migrimit të Greqisë Yiannis Mouzalas, pas lajmeve se Greqia ka marrë premtimin nga një pjesë e vendeve të BE-së se ata do t’i mbajnë kufijtë e hapur.
Mouzalas tha se Greqia mund të mbetej e vetme të përballej me rreth 70 mijë njerëz që gjenden në këtë vend në rast se kufijtë e Europës mbyllen. Organizata e Kombeve të Bashkuara deklaroi se 94 mijë njerëz kanë mbërritur në Greqi vetëm përgjatë shtatë javëve të para të këtij viti, një shifër e stërmadhe kjo pasi vitin e kaluar, kuota prej 100 mijë u arrit vetëm në mes të vitit.
Parashikimi është se numri i refugjatëve do të rritet me afrimin e verës.
Greqia e veriut u kthye efektivisht në një ishull brenda BE-së pasi Austria vendosi të kufizojë numrin e azilkërkuesve që përpiqen të kalojnë përmes saj në 3,200 në ditë, përfshirë një kuotë prej 80 azilkërkimesh në ditë brenda Austrisë.
Kjo lëvizje mërziti vendet e tjera të BE-së, duke hedhur themelet për një përplasje diplomatike në nivel të lartë gjatë takimit që pritet të zhvillohet të enjten dhe të premten në Bruksel, ku do të diskutohet njëkohësisht kriza e migracionit dhe rinegocimi me Britaninë e Madhe për anëtarësinë e Londrës në BE.
Gjithsesi, Austria i bëri thirrje vendeve të Ballkanit për të marrë pjesë në një takim specifik mbi migrimin në Vienë të përkurën, para takimit të ministrave të brendshëm të BE-së në Bruksel.
Në takim do të marrin pjesë ministrat nga Shqipëria, Bosnja, Kroacia, Kosova, Maqedonia, Mali i Zi, Serbia dhe Slovenia. Austria do të përpiqet të sqarojë kufizimet e saj të reja në kufij, pasojat e mundshme të tyre dhe përpjekjet për të koordinuar shtetet përgjatë shtegut të Ballkanit.
Në një ngjarje tjetër, një takim në Pragë nga Grupi i Vishegradit, ku përfshihet Hungaria, Polonia, Republika Çeke dhe Sllovakia, ku presidenti i Maqedonisë Gjorge Ivanov dhe kryeministri i Bullgarisë Boiko Borisov morën pjesë si të ftuar nderi – u debatua gjithashtu për krizën e migrantëve.
Gjatë takimit, kryeministri i Hungarisë Victor Orban bëri thirrje për përgjigje shumë më të ashpër ndaj krizës së refugjatëve. Pas takimit, Orban tha se Hungaria qe e gatshme për të ndihmuar cilindo vend “që është gati të krijojë një linjë të dytë mbrojtjeje në jug të Hungarisë”.