Budapesti po bën plane për ndërtimin e një barriere të re përgjatë kufirit të vet me Rumaninë në përpjekjen më të fundit për të mbajtur refugjatët jashtë.
Autoritetet në Bukuresht po presin për më shumë detaje para se t’i përgjigjen njoftimit në Budapest se Hungaria po planifikon të ndërtojë një gardh me tela me gjemba përgjatë kufirit me Rumaninë për të parandaluar refugjatët dhe migrantët.
Në një fjalim “mbi gjendjen e kombit” të dhënë të dielën, kryeministri i Hungarisë Viktor Orban tha se ai ka urdhëruar ministrat e brendshëm dhe të mbrojtjes të vendit të fillojnë punën për gardhin me tela me gjemba në përgatitje për një dallgë të re migrimi që ai pret të ndodhë gjatë muajve të ardhshëm.
“Nëse është e nevojshme, ne do ta mbrojmë veten tonë nga Sllovenia deri në Ukrainë,” tha Orban.
Vitin e kaluar, Hungaria ndërtoi gardhe përgjatë kufijve të vet me Serbinë dhe Kroacinë në përpjekje për të ndaluar një numër të madh refugjatësh që kaluan nga Lindja e Mesme për në Europë përmes territorit të saj.
Orban ka kritikuar gjithashtu një plan fillestar të BE-së për të rishpërndarë mbi 100 mijë refugjatë dhe migrantë mes 28 vendeve anëtare.
Ai tha se Brukseli po përpiqej të ndërtonte një “sistem detyruesh të përhershëm dhe të vazhdueshëm për rishpërndarjen” e regugjatëve dhe migrantëve, sipas një raporti të Asoçiated Press.
Në një ngjarje tjetër, Rumania mori 11 refugjatët e parë këtë javë, në bazë të skemës së BE-së për rishpërndarje. Ata do të strehohen në qytetin lindor të Galatit, pranë kufirit me Moldavinë.
Në vitet 2016 dhe 2017, Rumania do të duhet të pranojë 6,205 refugjatë sipas kësaj skeme.
Megjithatë, Rumania nuk është goditur ende nga dallga e refugjatëve dhe migrantëve që po kalojnë përmes Ballkanit drejt Gjermanisë dhe Europës veriore.
Vetëm 913 njerëz kanë aplikuar për azil përgjatë vitit të kaluar, 12 për qind më shumë se sa më 2014.