Një kontroll në terren i votuesve do të fillojë në Maqedoni javën e ardhshme për të verifikuar listën e fryrë të zgjedhjeve përpara se të mbahet votimi i përgjithshëm.
Kontrolli në terren i votuesve në Maqedoni, që do të fillojë të hënën do të ekzaminojë të dhënat e votuesve nga institucione të ndryshme shtetërore, për të treguar se sa votues janë “problematikë” dhe kanë nevojë për kontroll personal.
“Vetëm atëherë do të kemi një panoramë më të qartë të familjeve që duhen vizituar dhe se në sa vende duhet kryer operacioni” tha Subhi Jakupi, anëtar i Komisionit Zgjedhor, DIK.
Ekzaminimi dhe kontrollet pasuese në terren do të përcaktojnë nëse “persona nën 18 vjeç, persona të vdekur dhe ata pa karta identiteti maqedonase apo pa banim në vend janë listuar për të votuar,” shtoi ai.
Xhabir Deralla, kreu i Qendrës pë Liri, CIVIL, një OJQ që ka qenë në krye të monitorimit të zgjedhjeve në vend edhe herën e shkuar, është optimist dhe pastrimi i listës zgjedhore do të bëhet siç duhet.
“Kam besim te DIK kështu siç janë gjërat tani, veçanërisht sepse drejtohen nga një ekspert, një i pavarur dhe nuk janë më një ushtar i partisë,” tha ai.
“Me metodologjinë dhe rregullat e reja ata kanë një bazë solide për të siguruar një votë për person. Nëse i lëmë të bëjnë punën e tyre, pa i ushtruar presion, pa shantazh partiak apo kërcënime, do ta kryejnë procesin me ekspertizë,” shtoi Deralla.
Ndërsa partia VMRO DPMNE e Nikola Gruevskit këmbëngul se kontrolli elektoral është një operacion relativisht i thjeshtë, Social Demokratët në opozitës, SDSM, këshillojnë kujdes, duke i akuzuar kundërshtarët për zvarritje të procesit.
“Formimi i një Komisioni të ri Zgjedhor u votua me pesë muaj për të zvarritur këtë proces,” tha zv.kryetarja e SDSM, Radmila Shekerinska.
Pas presionit nga BE dhe SHBA, koalicioni qeverisës në parlament e shtyu të martën e kaluar datën e zgjedhjeve të parakohshme nga 24 në 5 qershor.
Votimi pasoi një vlerësim të BE-SHBA, ku thuhej se vendi nuk ishte gati për të mbajtur zgjedhje të lira dhe të ndershme.
Pavarësisht kontrollit të listës elektorale, reformimi i medias për të siguruar një nivel të profesionalizmit në raportim dhe mekanizmat për të ndarë aktivitetet shtetërore nga ato të partive politike, janë tre prioritetet kryesore që duhen përmbushur.
Aktualisht lista e votuesve përmban 1.8 milionë persona. OSBE, që ka monitoruar zgjedhjet në Maqedoni në të shkuarën e ka përshkruar si një shifër të pazakontë për një vend me rreth 2 milionë persona.