Një deputet ukrainas ka kërkuar ekstradimin e një nënshtetasi bullgar që dyshohet se u bashkua me luftëtarët pro-rusë në lindje dhe që aludohet se torturoi dhe vrau ushtarë dhe civilë ukrainas.
Një deputet ukrainas po kërkon ekstradimin e një nënshtetasi bullgar, Georgi Bliznakov, i cili akuzohet se është bashkuar me luftëtarët separatistë pro-rusë në lindje të Ukrainës dhe se ka vrarë civilë dhe ushtarë.
Deputeti Anton Gerashchenko, i cili është njëkohësisht këshilltar i Ministrisë së Brendshme, e bëri njoftimin në Facebook të hënën.
Gerashchenko, i cili më pas e konfirmoi informacionin për Radion Kombëtare të Bullgarisë, BNR, tha se ka kërkuar nga autoritetet e Ukrainës dhe nga ambasada e këtij vendi në Bullgari të lëshojnë një urdhër për ekstradim për Bliznakov, në dyshimin se ai pati hyrë ilegalisht në Ukrainë dhe pati kryer krime lufte.
“Nëse provohet se ai ka marrë pjesë në mënyrë të drejtpërdrejtë në vrasjen dhe torturimin e qytetarëve tanë, ai mund të dënohet me burg,” deklaroi Gerashchenko.
Një zëdhënës për ambasadën e Ukrainës në Sofie i tha BIRN të martën se ai nuk ka marrë asnjë njoftim zyrtar mbi kërkesën për ekstradim.
Edhe Prokuroria Shtetërore e Bullgarisë nuk ka marrë urdhër ekstradimi, tha për gazetarët prokurori i përgjithshëm Sotir Tsatsarov.
Bliznakov ka qenë nën arrest në Bullgari që nga java e kaluar, kur ai, bashkë me tri gangsterë të tjerë, rrahu një burrë dhe të dashurën e tij pas një sherri në Unazën e Sofies.
Një video e rrahjes brutale qarkulloi në internet dhe u transmetua nga të gjitha televizionet e vendit, duke shkaktuar zemëratë publike.
Aksidenti ndihmoi autoritetet e Ukrainës të identifikonin vendndodhjen e Bliznakov, i cili është renditur në faqen e internetit “Mirotovorets” (Paqeruajtësit), e Qendrës për Kërkimin e Shenjave të Krimeve kundër Sigurisë Kombëtare të Ukrainës, një organizatë me bazë në Kiev.
Në këtë faqe interneti, ku gjyrmohen separatistët prorus, nënshtetasi bullgar shfaqet në shumë fotografi krahas luftëtarëve të tjerë.
Bliznakov ka dy profile në rrjetin social rus “Odnoklassniki”, ku ka publikuar video të vetes ndërsa merr medalje në një ceremoni informale krahas separatistëve të tjerë.
“Unë i shërbej Republikës Popullore të Donetskut,” thotë ai në video pasi merr medaljen, duke iu referuar shtetit joformal të separatistëve. Raportohet se Bliznakov qe pjesë e një skuadre të separatistëve prorusë të quajtur “Taifun”.
ANëtarët e skuadrës, gjithsesi, deklaruan për median se nënshtetasi bullgar pati vizituar zonën e tyre për një javë për të bërë fotografi personale dhe se nuk kishte marrë pjesë në luftime.
Bliznakov ka lindur më 1969 iNë qytezën Pazardzhik në jug të Bullgarisë.
Fotografitë e publikuara prej tij në rrjetet sociale ruse tregojnë se në të shkuarën ai pati punuar për një skuadër të specializuar në luftën kundër terrorizmit në policinë bullgare. Ai qe gjithashtu një boksier, por që nuk ka luajtur për skuadrën kombëtare të Bullgarisë.
Sëbashku me pjesëmarrës të tjerë në sulmin ndaj çiftit të të rinjve në Unazën e Sofies, Bliznakov është duke punuar aktualisht si roje për Ivaylov Borissov i njohur me nofkën “Torino”, i cili është aktualisht në gjyq i akuzuar për trafik droge.