Aktivistë të partisë opozitare Lëvizja Vetëvendosja kthyen përmbys një kamion në shenjë proteste ndaj refuzimit të Beogradit për të shpërndarë tekstet shkollore nga Kosova, të cilat Prishtina ua dhuroi nxënësve etnikë shqiptarë në Serbi.
Aktivistët e Vetëvendosjes i dolën para kamionit ditën e enjte, pasi ai hyri në Kosovë nga Serbia në pikën kufitare të Merdares dhe e përmbysën atë, duke bërë që një pjesë e ngarkesës së tij të përhapej.
Vetëvendosja tha se kjo ishte një përgjigje ndaj vendimit të Beogradit për të mos lejuar tekstet shkollore nga Kosova që t’i shpërndaheshin fëmijëve shqiptarë në zonën jugore të Luginës së Preshevës. Zyrtarët serbë thonë se librat janë politikisht i njëanshëm, sepse ata e përshkruajnë Kosovën si një shtet të pavarur.
“Ky aksion është një përgjigje ndaj veprës penale nga ana e Republikës së Serbisë, e cila dje ktheu më shumë se 103,000 libra në gjuhën shqipe, duke i lënë nxënësit shqiptarë të shkollave në Preshevë, Medvegjë dhe Bujanoc pa libra,” tha Lëvizja Vetëvendosja në një deklaratë.
Partia opozitare tha gjithashtu se aktivistët e saj do të vazhdojnë protestat derisa Serbia të pranojë tekstet shkollore të Kosovës.
“Ata nuk i pranojnë librat tanë. Atëherë as ne s’do të pranojmë produktet e Serbisë,” tha partia.
Sulmi ndaj kamionit u konfirmua nga zëdhënësi i policisë së Kosovës, Baki Kelani.
“Po, ndodhi në fshatin Lupç, në rrugën Prishtinë-Podujevë,” tha Kelani për BIRN.
Autoritetet serbe i kthyen mbrapsht librat ditën e martë, pasi i mbajtën ata për më shumë se gjashtë muaj në një terminal doganor në Preshevë.
Azem Guri, një këshilltar politik i ministrit të arsimit të Kosovës, tha se kamionët ishin në anën kosovare të kufirit dhe se Prishtina do të vazhdojë t’i kërkojë Beogradit t’i lejojë ata të shpërndahen në shkollat në Luginën e Preshevës.
Guri shtoi se ministri i arsimit Arsim Bajrami do t’i kërkojë qeverisë serbe të respektojë marrëveshjen e arritur në shtatorin e kaluar, kur Kosova dhe Serbia ranë dakord të shkëmbejnë libra shkollorë për pakicat në vendet e njëri-tjetrit.
“Ministri Bajrami do të vazhdojë t’i kërkojë Beogradit të respektojë marrëveshjen. Ata kanë ndërmarrë një detyrim dhe duhet ta përmbushin atë,” tha Guri për BIRN.
Vetëvendosja organizoi veprime të ngjashme protestuese në vitin 2012 kur disa kamionë nga Serbia u përmbysën në një përpjekje për të mos lejuar mallrat serbe që të vinin në Kosovë.
Partia së fundmi është përfshirë gjithashtu edhe në protestat e fundit në parlamentin e Kosovës ku është hedhur shumë herë gas lotsjellës.
