![](https://www.reporter.al/wp-content/uploads/sarajevo-640.jpg)
Kompanitë turistike po fajësojnë për rënien e numrit të vizitorëve në Sarajevë në fillim të 2016, raportimet e medias mbi kërcënimet terroriste në Bosnje.
![Sarajeva. Foto: Clark and Kim Kays/Flickr](https://www.reporter.al/wp-content/uploads/sarajevo-640-533x400.jpg)
Profesionistët e sektorit turistik në Bosnje i tremben faktit se rënia së fundmi e numrit të vizitorëve mund të jetë për shkak të raportimeve nga media ndërkombëtare që e lidhin Bonje-Hercegovinën me fenomenin e terrorizmit ndërkombëtar dhe Shtetin Islamik, ISIS.
Sipas të dhënave nga Komuniteti i Turizmit në Kantonin e Sarajevës, në janar 2016 numri i turistëve të huaj ra me 17.5 për qind krahasuar me të njëjtin muaj një vit më parë. Ata thonë se një rënie e ngjashme do të konfirmohet edhe për shkurtin.
Megjithëse rezultati i dobët gjithashtu reflekton motin e keq të dimrit, që i dekurajon njerëzit nga vajtja në Sarajevë, një tjetër faktor pas trendit janë raportimet e kërcënimeve terroriste në Bosnje, tha për BIRN të mërkurën, Asja Hadziefendiç-Mesiç, nga Komuniteti i Turizmit në Kantonin e Sarajevës.
“Në fund të vitit 2015, ne kishim dy ngjarje që patën një impakt të madh negativ në imazhin e vendit tonë, sulmi në Rajlovaç dhe arrestimi i 11 të dyshuarve për planifikimin e një sulmi me bombë në Vigjilje të Vitit të Ri në Sarajevë,” tha Hadziefendiç-Mesiç.
“Shumë turistë vendosën të anulonin udhëtimet dhe rezervimet që kishin bërë si rezultat i kësaj”, shtoi ajo.
Më 18 nëntor, Enes Omeragiç, një banor i Sarajevës, qëlloi për vdekje dy ushtarë në lagjen Rajlovaç, në një sulm që autoritetet e kualifikuan si akt terrorist.
Javë më vonë, më 22 dhjetor, policia boshnjake arrestoi 11 persona me dyshimin e përgatitjes së një sulmi me bombë në Vigjilje të Vitit të Ri në Sarajevë.
Sipas Hadziefendiç-Mesiç, alarmi në rritje rreth kërcënimeve terroriste në Bosnje ka ndikuar veçanërisht te turistët nga Kroacia, që është vendi kryesor prejardhjes së turistëve në Bosnje.
“Numri i kroatëve që vizituan Bosnjën në janar 2016 gati u përgjysmua krahasuar me janarin 2015”, tha Hadziefendiç-Mesiç, duke theksuar se “media nga rajoni, veçanërisht nga Kroacia dhe Serbia” kontribuan në rritjen e alarmit rreth situatës së sigurisë në vend”.
Sipas Hadziefendiç-Mesiç , shqetësimet e sigurisë mund të ketë shkaktuar dëm të madh mbi turizmin në kryeqytetin boshnjak, që u bë një nga destinacionet kryesore të turizmit në rajon në vitet e fundit.
Megjithatë, profesionistët që operojnë në sektorin e turizmit i thanë BIRN se mbeten optimistë.
“Ne mendojmë se rezultatet e këqija të dy muajve të fundit janë kryesisht prej kohës së keqe,” tha për BIRN Elvis Cehajic, nga Relax Tours, një agjenci turistike në Sarajevë.
“Kërcënimet terroriste deri më tani nuk kanë ndikuar shumë në punën tonë, siç ndodhi për shembull me përmbytjet katastrofike të 2014,” shtoi Cehajic.
“Ne presim që ky sezon do të jetë më i suksesshëm sesa i mëparshmi,” përfundoi ai.