Një kamion me targa bullgare u kap nga Dogana e Kosovës ndërsa përpiqej të largohej nga vendi. Në të u gjetën një pafundësi dosjesh të marra nga Pallati i Drejtësisë, në një përpjekje që dyshohet se synonte të fshihte provat për ndërtimin e dyshimtë.
Zyrtarët e Doganave të Kosovës bllokuan kamionin pasi vunë re natyrën e pazakontë të mallit që po transportonte të martën, një pafundësi me dokumente. Policia njoftoi menjëherë Prokurorin e Përgjithshëm të Prishtinës, Imer Beka.
Beka i tha BIRN se dosjet duket se janë marrë nga Pallati i Drejtësisë. “Kemi dyshimet se kjo qe një përpjekje për të fshehur provat,” tha ai.
Që nga gushti i kaluar, Beka ka drejtuar një hetim mbi ndërtimin e Pallatit të Drejtësisë. Ndërtimi ka ngritur dyshime të shumta mbi koston e tepërt të projektit.
Beka tha se nuk kishte dijeni për dokumentet që qenë hequr nga Pallati i Drejtësisë. “Ne nuk kemi informacion të plotë për shkak se policia është ende duke e analizuar rastin,’ tha ai.
Zëdhënësi i policisë Baki Kelani i tha BIRN se kamioni u ndalua për shkak se shoferi nuk kishte leje për eksport. “Departamenti i krimit ekonomik të policisë po e heton çështjen,” tha ai.
Beka tha se kamioni mund të kishte hyrë brenda Pallatit të Drejtësisë për shkak se punimet ndërtimore aty vijojnë.
Pallati i Drejtësisë u ndërtua nga një kompani bullgare në partneritet me një kompani vendëse me një kosto prej gati 30 milionë eurosh të financuara nga Bashkimi Europian.
Ajo u inaugurua në mars 2015 dhe gjykata ka filluar të zhvendoset aty. Gjithsesi, që nga ajo kohë, stafi është ankuar mbi një seri problemesh teknike.
Më 14 shkurt, sindikata e punonjësve të drejtësisë organizuan një protestë ku ankoheshin për mungesë oksigjeni në zyrat e tyre. Ata raportuan gjithashtu raste të punonjësve që mbeteshin të bllokuar në ashensorë. Një studim i autorizuar nga prokuroria, zbuloi se niveli i oksigjenit brenda Pallatit të Drejtësisë qe 11 herë më poshtë standardit të lejuar.
Studimi u urdhërua pas shumë incidenteve brenda sallave të gjyqeve ku njerëzve u binte të fikët.
