Një projekt ndërkufitar mes Kroacisë dhe Bosnjes po i jep një jetë të re ish-hekurudhës së perandorisë austro-hungareze, duke iu përgjigjur kështu bumit të kërkesave për eksplorim të Ballkanit me biçikletë.
Një projekt i përbashkët mes Kroacisë dhe Bosnjes synon të rigjallërojë hekurudhat e vjetra të ndërtuara nga perandoria Austro-Hungareze duke krijuar një rrjet shtigjesh biçikletash, që gjithashtu do të zhbllokojnë potencialin turistik në rajon.
“Synimi i projektit është të rregullohet shtegu që dikur përdorej nga trenat,” tha për BIRN Ana Soldo, drejtoreshë e kompanisë publike Vjetrenica, organizata e zbatimit të projektit.
Puna për rinovimin e rrugëve ka filluar tashmë dhe duhet të përfundojë në fund të vitit, i tha BIRN Soldo.
“Ne do të sigurohemi që rrugët të pastrohen, të krijohen sinjale dhe informacion për turistët dhe gjithashtu të zhvillohet një rrjet subjektesh që mund të jenë me interes për zhvillimin turistik të shtegut”, tha Soldo duke shtuar se “dy ish-stacione trenash janë kthyer në motele”.
Projekti, që ka një kosto totale prej 2960,000 eurosh dhe që po mbulohet nga Instrumentet e Ndihmës përpara Pranimit nga ana e BE-së për rritjen e bashkëpunimit ndërkufitar, filloi në vitin 2014, nën emrin “Nëpër histori me biçikletë” ose “Rivitalizimi i hekurudhës së ngushtë – Ciro”.
Hekurudha fillimisht u ndërtua në vitin 1901 nga autoritetet austro-hungareze, që atëherë sundonin Bosnjen dhe Kroacinë. Ajo lidhte qytetin bregdetar të Dubrovnikut në Kroaci me qytetet e brendshme Trebinje dhe Capljina në Bosnje dhe shtrihej në një total prej 200 kilometrash, 120 km janë në Bosnje.
Një tren i njohur me avull, që njihej si Ciro, operoi deri në vitin 1971, kur autoritetet jugosllave mbyllën të gjitha linjat që nuk ishin fitimprurëse dhe mbyllën lidhjet hekurudhore me Dubrovnikun.
Sipas Ana Soldos, rinovimi i rrugës që “Ciro” përdorte do të ketë rëndësi të madhe për komunitetin.
“Hekurudha ka një rëndësi jetësore për të gjithë rajonin” tha Soldo, duke shtuar se sapo u mbyll njerëzit filluan të largoheshin gradualisht.
Me t’u përfunduar, shtegu i biçikletave do të lidhë disa destinacione turistike në rajon, ashtu si rezervati natyror Hutovo Blato dhe shpellën Vjetrenica, që është më e madhja në vend.
Ramiz Baziç, një ekspert i Bordit Turistik të Hercegovinës – Neretva Canton, gjithashtu tha se puna do të ketë një ndikim pozitiv në zhvillimin e rajonit.
“Është një projekt ambicioz, që me siguri do të jetë i mirë për kantonin pasi prezanton një mundësi për të ndihmuar zhvillimin e vendeve më të vogla, që janë përgjatë rrugës,” tha Baziç për BIRN.
Ai shtoi se çiklizmi ka një rëndësi të madhe në kuptimin e turizmit në rajon përgjithësisht.
“Në pesë vitet e fundit, numri i turistëve që dëshirojnë të zbulojnë këtë rajon me biçikletë është shtuar shumë. Ne tashmë kemi hapur dy shtigje, një në veri në Mostar dhe një në perëndim të territorit,” tha Baziç. “Ky projekt me siguri do të ndihmojë në shtimin e bashkëpunimit Kroaci-Bosnje,” përfundoi ai.
