Shqipëria po mban bisedime me Italinë dhe Greqinë për atë që mund të ndodhë nëse refugjatët e ngecur në Greqi do të përpiqen të hapin një itinerar tjetër për në Itali përmes Shqipërisë.
Teksa vendet e Ballkanit Perëndimor veprojnë së bashku për të ndaluar valën e refugjatëve në itinerarin e vjetër nëpër Ballkan, Shqipëria po mban negociata me Greqinë dhe Italinë fqinje rreth një fluksi të mundshëm refugjatësh në kufijtë e saj.
Megjithëse Shqipëria nuk ka qenë pjesë e itinerarit të Ballkanit deri më tani, ajo i druhet faktit se dhjetëra mijëra migrantë të mbetur në Greqi, – që me gjasa do të arrijnë një qind mijë refugjatë së shpejti – mund t’i drejtohen kufirit shqiptar.
Autoritetet shqiptare kanë zbuluar pak rreth negociatave që po ndodhin ndërsa samiti europian në Bruksel diskutoi zgjidhjet.
Zv. ministrja e brendshme Elona Gjebrea i tha programit televiziv Top Story të hënën se po mbahen diskutime me Greqinë pa zbuluar detaje.
“Nuk ka marrëveshje me Greqinë mbi refugjatët megjithatë ka diskutime dhe zgjidhja do të vijë brenda kornizës eurpiane”, tha ajo.
Media shqiptare, duke cituar burimet e ministrisë së jashtme greke, thotë se Greqia planifikon të dërgojë mijëra refugjatë në Shqipëri, megjithëse nuk është e qartë se cili do të jetë itinerari nëse kjo ndodh.
Kryeministri italian Matteo Renzi ka thënë se Roma i trembet rigjallërimit të trafikimit të njerëzve në itinerarin e vjetër të Adriatikut, nga Shqipëria nëpër rajonin e Pulias në Itali përmes detit.
Sekretari Italian i Shtetit për Çështjet Europiane, Sandro Gozi, pas një vizite në Shqipëri në fillim të javës, tha të mërkurën se po punonte me Shqipëri për një memorandum bashkëpunimi që do të ndihmojë vendin të sigurojë kufijtë.
“Ka një rrezik që itinerari i Ballkanit mund të bëhet itinerari i Adriatikut, ku përfshihet Shqipëria, Mali i Zi dhe pastaj Italia. Për këtë arsye, ne duam të përfundojmë sa më shpejt të jetë e mundur memorandumin që na lejon të ndihmojmë Shqipërinë,” tha Gozi.
Në dy javët e fundit, policia shqiptare ka intensifikuar patrullimet në kufirin me Greqinë dhe po kontrollohen në mënyrë strikte linjat e rregullta të autobusëve që transportojnë pasagjerë mes dy vendeve.
Kontrolle po mbahen edhe në zonat bregdetare për të eliminuar çdo mundësi të përdorimit të gomoneve nga trafikantët për të çuar refugjatët në Itali.
Në lidhje me kapacitetet pritëse, autoritetet shqiptare kanë identifikuar disa zona që mund të përdoren në rast të fluksit të refugjatëve megjithëse nuk po bëhen përgatitje të tjera.