Policia dhe ushtria shtoi praninë në kufirin e Maqedonisë me Greqinë teksa qindra refugjatë dhe migrantë krijuan një varg njerëzor për të kaluar përmes një lumi të rrezikshëm, duke hapur kështu një itinerar alternativ.
Tensionet u shtuan të hënën teksa refugjatët dhe migrantët, të ngecur për javë në një kamp grek ecën përgjatë kufirit dhe ia dolën të kalonin në fshatin jugor maqedonas të Moin, ku ishin dërguar trupa ushtarakë dhe policia në përpjekje për t’i ndaluar, raportoi media.
Ministria e brendshme maqedonase konfirmoi se rreth 1000 persona ishin përpjekur të kalonin ilegalisht kufirin dhe tha se po punonte të siguronte kthimin e tyre në Greqi.
Nuk ka pasur raportime të përplasjeve deri më tani, por policia nuk i ka lejuar gazetarët në fshat.
Të hënën në mëngjes, një kolonë refugjatësh dhe migrantësh filluan të largoheshin nga tenda e madhe e kampit Idomeni për të kaluar kufirin ku të paktën12,000 persona kanë ngecur prej javësh.
Një zëdhënës i policisë i tha BIRN se forcat e sigurisë ishin në vigjilencë.
“Forcat e sigurisë janë në terren dhe po qëndrojnë gati të reagojnë për të mbrojtur kufirin, sipas udhëzimeve dhe standardeve ndërkombëtare,” tha zëdhënësi.
Refugjatët dhe migrantët ngecën në kampin Idomeni në kushte të këqija dhe mot të përkeqësuar pasi Maqedonia, duke pasuar shembullin e Sllovenisë dhe vendeve të tjera në itinerarin e Ballkanit mbylli kufijtë.
Itinerari i marrë nga vargu i refugjatëve kalonte pranë një vendi ku tre njerëz u mbytën të dielën në mbrëmje në përpjekje për të kaluar për në Maqedoni, të përpirë nga rrjedha e lumit Suva Reka.
Policia maqedonase konfirmoi gjentjen e kufomave të dy burrave dhe një gruaje në lum.
Ata zbuluan se 23 të tjerë, shtetas afganë kishin hyrë në Maqedoni nga i njëjti vend.
Katër janë në spital ndërsa të tjerët u transportuan në kampin maqedonas të refugjatëve.
Maqedonia ndërtoi një gardh 27 kilometra përgjatë kufirit me Greqinë për të ndaluar hyrjet e paligjshme. Gardhi ndodhet në perëndim dhe lindje nga pika kufitare Idomeni, ku refugjatët janë akomoduar me tenda.
Javën e shkuar, liderët europianë dhe Turqia diskutuan mënyra për të penguar valën e refugjatëve dhe migrantëve që përpiqen të arrijnë në BE përmes itinerarit të Ballkanit.
Pas bisedimeve në Bruksel, presidenti i Këshillit Europian, Donald Tusk, paralajmëroi se ditët e migracionit të parregullt në Europë morën fund.
Ai këmbënguli se vala e refugjatëve nga Turqia dhe Greqia mbetet shumë e lartë dhe se duhet ulur ndjeshëm.
