Televizioni publik i Kroacisë ka anuluar programin satirik “Montirani proces” duke pretenduar se nxiste urrejtje fetare dhe etnike, megjithatë producentët e programit mendojnë se arsyet lidhen me qeverinë e vendit.
Radio-televizioni kroat, HRT, të mërkurën hoqi nga lista e programeve emisionin satirik “Montirani proces” [Proces i Sajuar].
Menaxhuesit e programit të HRT thanë në një deklaratë për shtyp se “pjesë të skenarit përmbanin fjalë të papërshtatshme për transmetim” dhe se kjo binte ndesh me “misionin, vlerat dhe parimet” e HRT.
“HRT mendon se çështja e programit satirik është keqpërdorur për të nxitur intolerancë fetare dhe kombëtare. Drejtuesit e programit janë të bindur se çdo media tjetër publike në botë do ta shihte si në shkelje dhe do ta refuzonte atë,” shkruhej më tej.
Televizioni informoi fillimisht median për vendimin pa kontaktuar më parë producentët dhe autorët e programit, skuadrën nga uebsajti satirik News Bar.
News Bar njihet për historitë e veta humoristike, lajmet e pavërteta dhe tekstet e videot satirike, për përqeshje në çështjet shoqërore, politike dhe kulturore në Kroaci dhe botë.
Pas shfaqjes së programit në një stacion televiziv, News Bar më pas e futi programin në një orar të ndjekur të së dielës në HRT.
Gjashtë episode janë shfaqur që nga Viti i Ri e mbrapa. Ato kombinuan raportime komike dhe skeçe në terren, si dhe lojëra argëtuese fjalësh me politikanë, analistë ekonomikë dhe gazetarë.
Borna Sor, një nga redaktorët e programit dhe moderator i “Montirani proces” konfirmoi se HRT nuk i kontaktoi ata së pari për mbylljen e programit.
Seria e tretë do të transmetohej të dielën e ardhshme.
“Në të ka disa shaka por asnjë prej tyre nuk nxit intolerancë fetare. Ky është veçse një justifikim pasi ata duan të na heqin qafe,” tha ai.
“Kjo është e gjitha një farsë. Ata duan të na largojnë sepse nuk jemi konservativë. Njerëzit thotë se është diçka që lidhet me krahun e majtë dhe të djathtë, por ne në skuadër jemi të gjithë progresivë dhe liberalë,” tha moderatori.
Sor mendon se lëvizja e re është pjesë e një përpjekje të lidershipit të HRT dhe qeverisë për të krijuar një hegjemoni kulturore konservative.
Përveç pezullimit të Montirani proces, në vetëm 10 ditë kreu i HRT, Sinisa Kovaçiç ka larguar 21 redaktorë dhe moderatorë me justifikimin e spastrimi politik.
