Qeveria e Rumanisë ka në plan të ofrojë një paketë incentivash financiare për blerësit e makinave elektrike dhe hibride në përpjekje për të ulur ndotjen në vend.
Në përpjekje për të rritur shitjet e pakëta në vend, qeveria e Rumanisë pritet të shpallë një program incentivash ekonomike me vlerë 16.6 milionë euro për të nxitur njerëzit të blejnë makina të reja elektrike ose hibride.
Paratë po ofrohen si një subvencionim për kompanitë apo individët të cilët blejnë një makinë elektrike apo hibride, me kushtin që makina të prodhojë më pak se 50 gramë për kilometër dioksid karboni.
“Rumania, njësoj si çdo vend tjetër i BE-së, duhet të fillojë tranzicionin drejt makinave elektrike apo hibride… jo vetëm për shkak se kjo është tendenca globale, por para së gjithash për shkak se ne kemi një problem me ndryshimet klimaterike,” deklaroi ministrja e Mjedisit Cristiana Pasca Palmer së fundmi.
Vetëm 495 makina të tilla u shitën në Rumani gjatë vitit të kaluar sipas të dhënave të Shoqatës së Prodhuesve dhe Importuesve të Automjeteve. Në vitin 2014 qenë shitur 236 makina.
Statistikat e Bashkimit Europian tregojnë se Rumania është në vend të fundit në BE sa i përket blerjes së makinave miqësore me mjedisin.
Njerëzit në këtë sektor mendojnë se incentivat e reja do të nxisin popullsinë të blejë makina elektrike.
“Gjithkund nëpër botë, shitjet e makinave elektrike kanë lulëzuar kur autoritetet kanë ofruar ndihmë financiare për blerësit,” deklaroi drejtori i komunikimit për BMË Rumania Alexandru Seremet.
“Norvegjia, Hollanda apo Kalifornia janë vetëm disa nga shembujt e suksesshëm. Autoritetet e Rumanisë nuk kanë bërë thuajse asgjë në këtë drejtim,” shtoi Seremet.
Ai argumentoi se subvencionimet e qeverisë janë të nevojshme për shkak se çmimet për teknologjinë e re janë ende të larta.
Aktualisht, çmimi për një makinë elektrike të shtresës së mesme mund të arrijë në mbi 30 mijë euro, shumë më tepër se sa mund të jetë në gjendje të paguajë rumuni i mesëm, thonë analistët.
Por edhe infrastruktura në mbështetje të makinave elektrike në Rumani është problem.
“Ka vetëm pak dhjetëra stacione rikarikimi në të gjithëvendin,” thotë Cristian Cojocaru nga faqja e internetit të reklamave të makinave Autovit.ro.
Pika e parë e rikarikimit në Rumani u hap në vitin 2011
Makinat elektrike kanë relativisht shkallë të ulët autonomie për shkak të problemeve të pazgjidhura me intensitetin e ulët energjetik të baterive. Makinat hibride kanë dy motorë, ku njëri punon me karburant fosil dhe gjatë punës, rikarikon një bateri e cila shërben për të vënë në punë një motor të dytë me energji elektrike.
