Kapiteni Florian Deliaj dhe togeri Donald Hoxha humbën jetën në një aksident ajror, ndërsa Ministria e Mbrojtjes po heton shkaqet e rënies së helikopterit mbi liqenin e Shkodrës.
Një helikopter i Ushtrisë shqiptare u rrëzua për shkaqe ende të panjohura në liqenin e Shkodrës, në afërsi të fshatit Grizhë të Malësisë së Madhe, duke shkaktuar vdekjen e dy pilotëve dhe plagosjen e një të treti. Sipas zyrës së shtypit të Ministrisë së Mbrojtjes, helikopteri i ka humbur kontaktet me Qendrën e Kontrollit dhe Raportimit në Rinas në orën 13.45 të mesditës.
Ministria njoftoi se helikopteri EC 145 ishte nisur nga Farka për një fluturim stërvitor drejt Malësisë së Madhe, ndërsa në bord kishte tre ushtarakë. Kapiteni Florian Deliaj dhe togerin Donald Hoxha dyshohet se kanë humbur jetën, ndërsa ushtari profesionist, Gerald Baramuça gjendet nën kujdesin e mjekëve në spitalin rajonal të Shkodrës.
Zyra e shtypit e Ministrisë tha se fluturimi stërvitor bëhej në përputhje me një program të miratuar më parë, por mbetet e paqartë se çfarë ka shkuar keq në bordin e helikopterit, i cili është vënë në përdorim të Forcave të Armatosura në nëntor 2015.
Në një konferencë për shtyp, shefi i Shtabit të Përgjithshëm, Jeronim Bazo tha se “Forcat e Armatosura humbën dy ushtarakë të devotshëm dhe pilotë të dalluar”.
“Forcat e Armatosura dhe Ministria e Mbrojtjes kanë angazhuar të gjitha burimet e tyre për të hedhur dritë mbi rrethanat e këtij aksidenti tragjik,” tha Bazo.
Një banor i fshatit Grizhë i tha News 24 se të parët që mbërritën pranë helikopterit të aksidentuar ishin disa peshkatarë. Ata i dhanë ndihmën e parë ushtarit të plagosur, i cili u dërgua më pas në spital.
Pas aksidentit të rëndë, drejt Shkodrës kanë shkuar ministrja e Mbrojtjes, Mimi Kodheli, ministri i Brendshëm, Saimir Tahiri dhe ai i Shëndetësisë, Ilir Beqja. Ata kanë vizituar në spital ushtarin e plagosur, Gerald Baramuça, gjendja e së cilit është jashtë rrezikut për jetën.
Foto nuk eshte e LSA, eshte e Ministrise se Mbrojtjes.