Iliaz Fisheku, një biznesmen i dënuar më parë për moskallzim krimi për kontrabandën me naftën virxhine, është arrestuar përsëri nën akuzën e evazionit fiskal e kryer në bashkëpunim me shatë punonjës tatimorë.
Të premten policia e shtetit njoftoi përmes një deklarate për shtyp arrestimin e tetë të dyshuarave –mes të cilëve edhe biznesmenin Iliaz Fisheku, për akuzat fshehje të ardhurash, shpërdorim detyre dhe mospagim i taksave dhe tatimeve.
Arrestimi i tetë të dyshuarve erdhi pas një hetimi një vjeçar të ndërmarrë nga Drejtoria e Hetimit Tatimor Tiranë në bashkëpunim me Njësinë Task Forcës të Prokurorisë së Rrethit Gjyqësor Tiranë.
Nga hetimet e kryera ka rezultuar se shtatë inspektorë të Drejtorisë Rajonale Tatimore Tiranë gjatë periudhës kohore 2010 deri më 2015, gjatë ushtrimit të detyrës së tyre funksionale kanë favorizuar subjekte të ndryshme tregtare.
Ndër subjektet e favorizuara kanë qenë dhe kompanitë Martini Petrol dhe Petrol Impex të biznesmenit Iliaz Fisheku.
“Martini Petrol, me aktivitet në fushën e tregtimit të karburanteve, është lejuar të kryejë aktivitet tregtar pa u regjistruar në QKR dhe organet tatimore, duke i shkaktuar buxhetit të shtetit një dëm në vlerën 101.8 milionë lekë i konsideruar evazion fiskal,” tha policia e shtetit.
Biznesmemeni Iliaz Fisheku është një emër i njohur për drejtësinë shqiptare. Në vitin 2012 ai është dënuar nga Gjykata e Tiranës për moskallzim krimi, si pjesë e një skeme gjigande të kontrabandës së naftës virxhin.
Fisheku ka qenë një nga të trembëdhjetë të akuzuarit si pjesë të ashtëqujturës çështja e naftës virxhin- skandali më i madh ekonomik i hetuar nga Prokuroria Shqiptare.
Por edhe pse skema e kontrabandës i kishte shkaktuar dëme të përllogaritura në dhjetra miliona euro taksapaguesve, të akuzuarit kryesorë morën dënime qesharake nga gjykata.
Iliaz Fisheku u dënua me 10 muaj burg, kurse biznesmeni tjetër i akuzuar për çështjen e kontrabadnës, Hajri Elezi, vetëm me 6 muaj heqje lirie.
