Vendimi për të emëruar si zëvendës ministre të sportit, legjendën e skive Janica Kosteliç, i shtohet lëvizjeve të qeverisë kroate për të përdorur atletë të suksesshëm për të fituar popullaritet.
Një vendim për të emëruar legjendën e famshme të skive Janica Kosteliç, si asistenten e re të ministrit të shkencës, arsimit dhe sportit, Predrag Šuštar, është parë si një lëvizje populiste me pak pasoja politike.
Kosteliç konfirmoi të hënën se ajo do të jetë asistentja e ministrit përgjegjës për sportin në qeverinë e re të qendrës së djathtë.
“E pranova këtë punë, sepse pas një karrierë sportive dua gjithsesi të kontribuoj për sportin në Kroaci, sidomos në aspektin e sportit dhe të rinjve,” tha ajo, duke theksuar se shumë njerëz e kishin pyetur përse nuk ishte përfshirë më në sport.
“Shpresoj se në përpjekjet e mia në një rol të ri do të ketë mbështetje të gjerë dhe të më jepet mundësia t’i kthej sportit dhe Kroacisë, atë që sporti dhe Kroacia kanë dhënë dhe bërë për mua”, shtoi ajo.
Dea Redziç, redaktore në uebsajtin kroat të lajmeve Indeks, që ka ndjekur sportin në Kroaci për vite me radhë, shpreh dyshime për atë që Kosteliç mund të arrijë në rolin e saj të ri.
Redziç tha për BIRN se zyrtarët shtetërorë duhet të kenë kualifikime profesionale ose diploma universitare për të kryer detyrat e tyre, që nuk është rasti i Kosteliç.
Ky është një lloj kompromisi dhe një vazhdimësi e praktikës së dhënies së atletëve të njohur pozita në qeveri, duke ‘blerë’ simpati publike. Unë do të thosha se ky është një vendim populiste,” tha ajo.
Redziç tha se pavarësisht sukseseve të Kosteliç në sport, nuk është e qartë se sa njohuri dhe ekspertizë ka ajo për të adresuar problemet serioze në sport.
Ajo shpjegoi se probleme të tilla përfshijnë “krijimin e një kuadri ligjor për sportin”.
Ka pasur shembuj të ngjashëm të emërimeve të tilla në të kaluarën në Kroaci. Ish- basketbollisti Petar Skansi shërbeu si asistent në të njëjtën ministri në qeverinë e mëparshme. Lojtarë dhe trajnerë basketbollistë, atletë të polos, hendbollit dhe arteve marciale janë bërë deputetë në Kroaci nga viti 2003 e tutje.
Analisti politik Davor Gjenero tha BIRN se ndërsa lëvizja më e fundit ishte “ndoshta për të fituar simpatinë publike”, emërimi i një ylli si në ministrinë e sportit është mjaft i “parëndësishëm në aspektin e qeverisjes në përgjithësi”.
“Për qeverinë, sektorët më të rëndësishëm janë të lidhura me ekonominë, financat dhe natyrisht, shkencën dhe arsimin. Sporti nuk është aq i rëndësishëm,” tha ai.
“Askush nuk pret që Kosteliç të zgjidhë problemet më të mëdha në sport”, siç çështjet ligjore dhe korrupsioni shtoi ai.
Kosteliç është kthyer në qendër të vëmendjes për herë të parë që nga tërheqja nga sporti në vitin 2007, në moshën 25-vjeçare, për shkak të arsyeve shëndetësore.
Në një karrierë profesionale nëntë-vjeçare, ajo fitoi gjashtë medalje olimpike ari dhe dy të argjendta, si dhe pesë medalje të arta në kampionate botërore të skive dhe tre kupa në ski.
Ajo konsiderohet si atletja më e mirë profesionale kroate dhe revista sportive amerikane Sports Illustrated e përmendi atë si 13 atletet më të mira femra të dekadës në vitin 2009.
